Зи фикирркай хранавай епинал
Са йифиз жув асмишзавай ахварай.
Лацу шивре лувараллаз эркинал
Тухузавай зун сейрдиз цаварай.
Тамашайла цавун аршдай чилериз,
Къурху хьана, акъатна хар бедендиз.
Аламатар акур язух вилериз
Аян тахьуй гьич мусурман бендедиз.
Шагь-Дагъларай авахьна ивид селлер:
«Эх жезамач нефс, пехилвал инсанрин,
Чи архайри чан гана хвейи чиллер
Девлетрихъ къе маса гузва душманрин.»
Гьуьл рахана лепеяр хьанвай рехи:
«Куьз ийизва лавгъавилер жегьилри?
Гьуьрметзамач, чизамач гъвеч1и-ч1ехи,
Кьабул тийиз тербия чи несилри.»
Цав ишехьна, къув язавай гарари…
Ак1 жедай хьи - мукьвал я дуьньяд эхир.
Гьайванрини, къушарини, тарари:
«Я Сад Аллагь, вуч я бес чак квай тахсир?»
Шукур Аллагь, акьалт1 хьана залум йиф,
Ракъин нурар - зи дердиниз хуп1 дарман !
Пенжердай вил вегьейла, са лацу лиф
Хъуьрена заз- ислягьвилин я лишан!
Гужлу ахвар
© Copyright: Джульета Омарова, 2018
Свидетельство о публикации №118032506975
Свидетельство о публикации №118032506975
Рецензии