Йыр дюньяма сен хошгелдинг, охувчум,
Гел, базып гел, багьа бер гьар сёзюме.
Дюр чю олар мени бары байлыгъым,
Гёз ачгъанда гёрюнеген гёзюме.
Нече-нече, жангъа къыйын болгъанда,
Акъ кагъызгъа сыр чечип, ял болгъанман.
Гьислеримни сатырлагъа салмагъа
Тил хазнадан гюч ва илгьам алгъанман.
Сатыр булан юреклеге ёл салып,
Сёзлеримни урлукъ этип сагъанман.
Гёнгюллерде уянарын не гюллер
Билип болмай ойлай туруп къалгъанман.
Яшыл тюсю болармыкен язбашны
Яда буса гюнгюрт гюзню сариси?...
Сюер эдим тюрлю-тюрлю ренклерде
Сёнмес гюллер болуп чыкъса гьариси!
Йыр дюньяма сен хошгелдинг, охувчум...
© Copyright: Нурьяна Арсланова, 2018
Свидетельство о публикации №118032510837
Свидетельство о публикации №118032510837
Рецензии