Фугъара

Пучна йисар на уьмуьрдин сефил яз,
Къунши шаддиз акурлайни пехил я,
Фендигардиз лукlвал ийиз гъафил яз,
Амалдаррин есир хьайи фугъара!

Ахмакь хьана, къадир хьанач гьуьрметдин,
Алчах папа кутазва вун личекдик,
Галтугзава нянет алай девлетрихъ
Амалдаррин есир хьайи фугъара!

Дустни душман тийижир са пенек хьиз,
Винелай вун аквада са эркек хьиз,
Чарабурун арадани са шек хьиз
Амалдаррин есир хьайи фугъара!

Бухар пармак аквазва ваз усал яз,
Папан вахчаг чинал жеда дасмал яз,
Гьайиф уьмуьр физва куьруь и гьал яз,
Амалдаррин есир хьайи фугъара!

Са шумуда ви ажузвал лянетнай,
Алчах амал мийир лугьуз минетнай,
Гьайиф уьмуьр, вуна бегьем къелетна,
Амалдаррин есир хьайи фугъара!

Тариф авурт1ани чlулав лацу жеч,
Усал гьайван яд гуналди яцlу жеч,
Муркlади кьур чуьллерни мад къацу жеч.
Амалдаррин есир хьайи фугъара!

И дуьньядал багьа са зат1 намус я,
Лугьудач хьи эркекда вич тlавус я!
Бес вучиз вун зирзибилдин къе дуст я?
Амалдаррин есир хьайи фугъара!