***

Куьз герек жен хьи, заз и чlал,и хуьруьн чlал-куьне лагь,
Вуч я менфят адан,кьаз я куьне ам вине,лагь.

Бубади заз лугьуда рахамир,акцент жеда ваз,
Лезги тирди виридаз чир жеда,"решхент" жеда ваз.
Туба хьуй легьзедиз,а чlал рахадай зенд жеда ваз,
Хъулгьудач ваз "бакили",тlварци лакьаб "кент" жеда ваз.
Куьз герек жен хьи,заз и чlал,и хуьруьн чlал-куьне лагь,
Вуч я менфят адан,кьаз я куьне ам вине,лагь.

Рахадач лезги чlалал зав буба-мад гьикl лугьуда?
Дидеди зун рахурайтlа-бубади "йикь" лугьуда.
Вич ада кьазни "шегьерли",газардиз  "куьк" лугьуда,
Хуьряй атай лусариз лус ваъ- "эвелик" лугьуда.
Куьз герек жен хьи, заз и чlал,и хуьруьн чlал-куьне лагь,
Вуч я менфят адан,кьаз я куьне ам вине,лагь.

Гад хьайила,хъфида "отдыхатиз" зун хуьрериз,
Къайи дагъдин вацlара сирнавариз,физ вирериз.
Къугъвада дуст-танишрихъни галаз зун,хъуьрериз,
Амма заз мадни майил жеч хайи чlалан сирериз-
Куьз герек жен хьи,заз и чlал,и хуьруьн чlал-куьне лагь,
Вуч я менфят адан,кьаз я куьне ам вине,лагь.

Дуьз я,лугьуда чlехи бубади,чlал чира,бала,
Хайи чилихъди на жув,чан хва,гьамишани яла.
Дахдилай вун вине хьухь,чlал чира,са чешне къалагь...
Кьуьзуь касдизни чидач лезги чlалахъ файда галач-
Куьз герек жен хьи,заз и чlал,и хуьруьн чlал,куьне лагь,
Вуч къведа заз адакай,вуч я хийирдин бине,лагь.

Гьич лугьуз,лезги я зун,кlанни жедач заз вирина,
Кичlе я заз,вирида зун къалуриз,зал хъуьруьна.
Вуч хийир ава хьи,виже текъведай чlал чирина?
Чlугамир зегьмет адал,чира "урус","туьрк"-вуна,
Куьз герек жен хьи,заз и чlал,и хуьруьн чlал-куьне лагь,
Вуч я артухди адан,вуч я авайди вине,лагь.