***

З У Н   КЪ В Е Д А

Руквад кьунва к1унт1ал алай хуьруьн рехъ.
Улакь авач. Ракъини канва кьални векь.
Юрфариз зи акъатайт1ан курум гьекь,
Яхди хьуниз килиг тийиз зун къведа.

Чизва, ви вил зун къвезавай рекъелла,
Валлагь, зунни вун акваз к1анз цигел я.
Пагь, чун санал хьун, чаз гьикьван гуьзел я!
Дарих хьана, сефил жемир, зун къведа.

Вун зи рик1ел алаз гзаф вахт хьана,
Рик1ел хкун зун патал ви бахт хьана.
Ви вилик зун къвазда кьве мет къат хьана.
Къужах ац1ай цуьквер кьуна зун къведа.

Зун жеда ви назни, таваз гьисс ийиз,
Ахъайда ваз рик1ин сирер кис тийиз,
Чи арадавай мензилдиз килиг тийиз,
Къамат-дидар акун патал зун къведа.

Са вахтара санал к1елай чун таяр,
Вун рик1еваз алатнава а йисар.
Къе кьисметдиз атанва вун зи, Аяр.
Т1имил ама -санал жеда, зун къведа.

Ингье гатун йикъар ама - кьве вацран,
Гуьгъуналлаз къвезвайдини зул я кьван!
Чаз камайди жуван хизан-къул я, чан!
Лезги мехъер жеда, - тухуз зун къведа.

1979 й.
Гъилин хат1арин дафтардай