Стихи на других языках

Даимси ц1ала гьалар
Чуйна т1ашризаслира,
Игит-шагьар Сталинград
Гьалабилзан наб гьаман.

Илав увкалунси сай
Дила нешлара дудеш,
Х1ябилра дурхъаси саб
Дергъла ц1урьас даршудеш.

Т1ашлира шип1рярг1или,
Ц1елда кьяйда миц1ирси,
Гьанбиркули х1ярп-х1ярпли
Нешла далай хумарси.

"Хъяшари верх1ел дусла
Ну дергь бех1бихьибх1ели,
Таманра х1ебирар ил
Лералцадх1и миц1ирли.

Янила чиллализиб
Ц1УДАР кагъар касила,
Бикалра сецад манзил,
Х1ебиц1ур миъ урк1илаб.

Х1ЯБРАЗИБ х1яб агарли,
Чедиб ц1елда агарли,
Дявла халал майдайчив
Ва дила веркьиб вара?

Куц-кабизлизив жагал,
Бахъал г1ях1лала г1ях1ял,
Х1у алхнила хабарли
Хумарбарибгу бахъал".

Хабарла хала дудеш,
Х1у калири гьабзали,
Дибгашанти х1ед бик1и
"Паччях1ла Муса" или.

Гьунартачила илцад
Х1****аслира селра,
Чебях1 Чедибдешлизиб
Лебси саб пай х1елара.

Дурхъал у илбагьандан
Калахъес даршдусмазиб,
Кьуръаннизи аятван,
Бурцулра назмулизи.