Варз, къе вучиз ишигълу я икьван вун-
Регьят кlелиз жезва ктаб гъилевай.
Куьтягьнани сирер чирна на цавун,
Чирагъ кьуна къвекъвез икlа чилерал?
Чил авунва ажайибдиз экуь на-
Ви нураркай гьуьл хьанава эхъведай.
Рехъ хуьз авай сусанбур я акунар:
Авани ваз кlаниди вав хкведай?
Цавунни,заз акваз,худ я кефи къе,
Куь арада амай хьиз туш къайивал:
Маний жедай циф-хъен тазвач ви рекъе,
Фад-фад жез я цавариз и майилар?
Лацу йифер жедайди туш чи инра,
Абур жедай зи бадедин махара...
Амач,фена зи бадени ширин а,
Гагь-гагьди заз ахквазама ахварай.
Белки юкъан бахишрикай чуьнуьх жез,
Умуд йифен мичlивилел вегьенвай
Кlанибурин гуьруьшрихъ са синих жез
Кичlевиляй нур виринриз цикlенва?
Кушкуш ийиз багъ-бахчадин пипlера
Авайбурал чlугазвани къаравул?
Белки абрун севгид кузвай рикlериз
Дугъри-турус рехъ къалуриз ава вун?..
22.06.17
Варз, къе вучиз...
© Copyright: Намик Фарзалиев, 2017
Свидетельство о публикации №117122202591
Свидетельство о публикации №117122202591
Рецензии