Его величество Низами...

Хосрова жузуна:"Гьинай я,жегьил?"
Фаргьада жавабна:"Зи ватан-Дуст чил."
Хосров:"А Дуст чилел вуч я кеспи-кар?"
Фаргьад:"Чан маса гуз,къачузва гъамар."
Хосров:"Чан маса гун эдебдин кар туш".
Фаргьад:"Ашкълибуриз талукь къарар туш."
Хосров:"Рикlивай ян ви ашкъи,ви гъам?"
Фаргьад:"Рикl вуч я хьи-чандай къвезва ам."
Хосров:"Азиз ян ваз ашкъи,Ширинан?"
Фаргьад:"Чандилайни заз ам ширин я."
Хосров:"Аквадани варз хьиз ам,йифиз?"
Фаргьад:"Ахвардач за,атайтlан вилиз."
Хосров:"Алатда ам ви рикlелай мус?"
Фаргьад:"Зун накьварик акатай чlавуз."
Хосров:"Акъатайтlа вун адан вилик?"
Фаргьад:"Кьил эцигда за лап кlвачерик."
Хосров:"Вучда кьван ви са вил хериртlа?"
Фаргьад:"Муькуь вилни къурбан хъийида."
Хосров:"Кягъайтlа адак гъил сада?"
Фаргьад:"Къван хьайитlан,ам ракьу хада."
Хосров:"Эхир ви гъил агакьдач адав."
Фаргьад:"Ийер квада варзни яргъалай."
Хосров:"Бес уьмуьр ви адаз кlан хьайтlа?"
Фаргьад:"Къачу лугьуз адвай тlалабда."
Хосров:"Лагьайтlа,це на заз кьил жуван?"
Фаргьад:"Акъатда,фад гана,буржинай."
Хосров:"Вун яргъаз хьухь и дуствиликай."
Фаргьад:"Дуст ксари ийидач а кар."
Хосров:"Архайин хьухь,буш я ви хиял."
Фаргьад:"Архайинвал жедач заз гьалал."
Хосров:"Сабуруниз къарар це вуна."
Фаргьад:"Чандин патал,жедан сабурна?"
Хосров:"Сабуринкай файда жеда ваз."
Фаргьад:"Гьич сабурдай рикl авач хьи,заз."
Хосров:"Квекай гзаф ваз кичlе я кьван?"
Фаргьад:"Кичlе тир тек шеин тlвар-гьижран."
Хосров:"Кlандани ваз са ашна,заз лагь?"
Фаргьад:"Жувакайни зун хьанва икрагь."
Шагьдив мад хгудай жаваб жагъунтиз,
Давамар хъувунач вичин рахунриз.