***

...И хкетдин ван атанай заз дидедвай,зи дустар-
Хкетривди акьул гунрин хупl тучирни ам устар...
...Къушарин пачагьди,лекьре,са юкъуз,
Кlватlна къушар вири,туна жаваб гуз:
"Нивай къалур жеда,гъида зи патав,
Къушарин нин шараг ийерди ятlа?"
Килигиз тир къушар сад садан чиниз,
Пачагьдиз вуч жаваб гуда-чин тийиз.
Акъатна,пехъре,кам вилик вегьена,
Вичин кьил агъузна,шагьдиз лагьана:
"Пачагь,вун сагърай,за и кар ийида-
Гьинватlан,жагъурна,ви вилик гъида."
Эмирна пачагьди гьаман сятда,
Лагьана:"Акl ятlа,фад рекье гьата!"
Чуьл атlуз,мензилар кlариз,пехъ фена,
Къушарин виридан мугар къвекъвена.
Къвекъвена дагълара,чуьлда,тlамара,
Къвекъвена талайра,дуьзда.кlамара.
Килигна цавариз,гьамни чилериз-
Акунач ийер сад адан вилериз.
Гьикьван фагьумнатlан,кьатlанач вили-
Шарагар сад-садаз ухшар тир вири.
Гьафтеяр элячlна,варцар алатна,
Пехъ къвекъвей кьадарар хьана галатна.
Вяде агакьнавай,лекьре эцигай,
Секинсуз тир къаргъа,хьана кьецlи,кар.
Пашмандиз,вучдатlа,къаргъа,чин тийиз,
Элкъвена хтана мад вичин кlвализ.
Фикириз яз,ама,гьикl и баладай
Акъатда-вил фена вичин баладал.
Гьикьван ийер акваз тир вичин шараг-
Вич-вичиз гьял я кар-фад кlвачел къарагъ!
Сад лугьуз,шад хьана,хъуьрез хьана пехъ,
Атанвай акьулдиз азгарвилин экв.
Теменар къачуна вичин баладвай,
Шуькуьрна-хкатна ам и баладкай.
Мецивди сигъалар гана шарагдиз,
Лувуник кутуна,тухвана шагьдиз:
"Пачагь,вун сагърай.за ийерди гъана,
Идалай ийерди мад зав жагъанач!"
...Пачагь вич-вичивди камаллу къуш тир,
Дидедин гьиссерни адаз таниш тир.
Пlузаррин кlаникай хъверна ада са,
Пехъре авур "гъалат" адаз багъишна...
...Инал куьтягь жезва ингье,зи къиса,
Адакай хкудна за и нетижа:
Набут хьуй,гачал хьуй-гьар са дидедиз,
Вичин багъри бала (а)квада ийердиз!