Чида анжах заз...

Вуч гьисс  ава зи рик1е
Чида анжах заз...
Къекъвезвай зулун рекье
Жуван бахтни гваз...

Минет я: вил эцигмир -
Им тек зи бахт я.
Чин ч1урна заз килигмир -
Зул, эхь,ви  вахт я...

Уьмуьрдин са пай фена-
Са акьван амач...
Зи гатфар гила кьена, -
За ваз лагьанач..

Зул, ви  серин легьзейри
Гузва гагь гатфар -
А гатфарин берейрин
Бахш я - гьисс,  ц1арар...

Патав зи - марф атана
Ст1аларни гваз...
Зулу тадиз вугана
Пешерикай таж.

Фад экеч1а, чуьнуьх хьухь,
Кьежин тавурай!
Тамир гатфарни кьулухъ-
Чаз чим, рагъ, гурай

Гьа и гафар лагьайла,
Зулу зи япал,
Гатфар рик1е къугвана -
Гьисс - руьгьдин капал...

Вири алем элкъвена
Бахтлу рик1ерлай…
Язух текъвез, къекъвена
Марф зи хъуькъверлай…

Лагь кван, акъваз, вучиз вун
Икьван бахтлу я?
Атанва ви вахт зулун -
Гьадаз  буржлу я…

Вири сирер ваз лугьуз
Жедач, марф, завай…
Икрамзава за зулуз
Гьиссер цававай...

Вуч гьисс  ава зи рик1е
Чида анжах заз...
Къекъвезвай зулун рекье
Жуван бахтни гваз...

Зулун йикъа АЧУХНА
Вичин гьиссер заз.
Шехьна цавар, къваз тийиз,
Накъварихъ галаз...