гъезел
Гулалийрин Эйвазаз.
Милаим хъвер пIузарин-къаймах ава Эйвазахъ,
Михьи рикIин гьиссерин булах ава Эйвазахъ.
Санал кIватIна стIалар, авахьзавай чешмедай,
Руьгьдин рузи теклифдай чанах ава Эйвазахъ.
Садвал,сихвал бинеда,къайгъударвал вине кьаз,
Илгьамдаррихъ галкIурдай къармах ава Эйвазахъ.
Къени дустар хтар хьиз, акалнавай епинихъ,
КIевиз кьунвай рикIин кIир,санжах ава Эйвазахъ.
Лезги къулан яхI,абур,мугьмандиз са тике фу,
Гегьенш суфра экIядай сумах ава Эйвазахъ.
Вич яргъайни жезвай чир,дагъдин са пад, къая тир,
Шарвилидин хтулдин бухах ава Эйвазахъ.
Чапла пата хурудин,чеб ялавриз элкъвезвай,
Акъудзавай цIелхемар, чахмах ава Эйвазахъ.
Вичиз хас яз захавал,"чан жуванбур" мецеллаз,
Вири санлай кьаз гьазур къужах ава Эйвазахъ.
Сейфудин вун гъалатI туш,дуствилин гъил гай адав,
Намусдин пар квай,залан бапIах ава Эйвазахъ.
© Copyright: Сейфудин Шахпазов, 2017
Свидетельство о публикации №117110808496
Свидетельство о публикации №117110808496
Рецензии