Фитнечидиз

АлукI ийиз пекер багьа,
Къачуз къизил са пут тагъа,
Саймиш тийиз инсан -"нагъа",
Вун вуч кас я, пачагь яни?
Я тахьайтIа, алчах яни?

Калтуг ийиз, лашни кьуна,
Сивел атай себ гуз вуна,
Рекьер, чуьллер на ваз кьуна.
Вун вуч кас я, пачагь яни?
Я тахьайтIа, алчах яни?

Югъди йифди жеда юрта,
Гьар инсандин къаравулда,
Вуж акьада ви гъавурда!?
Вун вуч кас я, пачагь яни?
Я тахьайтIа, алчах яни?

Инсанвал гьич, квач са кIусни,
Регъуь, гьая, я намусни.
Шатал хьиз ви жеда пIузни,
Вун вуч кас я, пачагь яни?
Я тахьайтIа, алчах яни?

Негьиз инсан, виляй вегьез,
РикIин къене агъу къекъвез,
Яргъи жез, иландин хьиз мез,
Вун вуч кас я, пачагь яни?
Я тахьайтIа, алчах яни?

Чир хьухь, кас, ваз инлай кьулухъ,
Инсан мал туш, ялиз чIурухъ.
ГалтIам ягъиз , гьардан хурухъ,
Вун вуч кас я, пачагь яни?
Я тахьайтIа, алчах яни?

КичIе хьухь ваз Аллагьдихъай, Къачузвай кьван гунагьдихъай.
Жедач катиз я агьдикай,
Вун пайчагь туш, алчах я са,
Намусдин гъвел квачир кваса!