Ичкидал рик1 алай интеллигент

Председатель тир Тахир
Шегьердин судда авай.
Яшар жегьил кас тир ам,
Хъунин кар худда авай.

Чирвилерни гаф тир
Дуьз меслятар ийидай.
Анжах жедачир са югъ
Эрекь дадмиш тийидай.

Гагь машинда ацукьна
Кантордиз фад къведай ам.


Гагь кьежириз марфади
Таж гъилеваз жедай ам.

Гьак1 ят1ани меслятар
 Ада суддал эцигай,
Куьмек гун я, лугьудай,
Касди  жедай вичигай.

Тахир гьик1 я , куьлегар
Гахчунан мад папа ви.
Тунвай хьтинди тир на
К1уф ,сенфиз мад къаца ви.

Зарафатдай дустари
Чир хьанвай Тахиран т1ул.
Лугьуз жедай, мад папа
Калтугнани Вахъ  гваз кул?

Акьван регьят к1валах туш
Суьрсет к1ан я мефт1ериз.
Куьтягь хьайла харждай зат1
Хъваз твазва зав , эвериз.


Гена хъсан хьанва заз
За хъвайила ичкияр.
Зи папа, машин гьалдай
Гузавач заз эхтияр.

Гьа суддин къарарарни
Зун к1валахал къведалди
Паб жеда зи кьиле тваз
Лап кьил гижи жедалди.

Зи  к1валахрин  гьунарар
Сад  ички я, садни паб.
Гьа и кьве зат1 , тахьайт1а
Гун хъийидач рик1и таб.

Паб герек я акьуллу ,
 лагьана мад судьяди.
Бахтлу я зун , ихьтин паб ,
багъишна заз худади.

Агалайт1ани рак1ар ,
Хъфида зун дак1ардай.
Кьил акъудун , дустар квез
Регьятни туш и кардай.