***

Цlийи юкъан пакам я са...
Кlвалахал физ,хьана гъазур,
Акъатзава ракарай зун.
Коридорда расал жезва
Зи къунши,зал.
Гайи салам вахчудачир
Къунши-завал...
Гьинай атай кар я има-
Вичи сифте салам гузва
Мили-мили?
Тажуб хьана зун алама...
Геж хгана лугьуз жаваб,
Регъуьни я заз са тlили.
Акъатзава зун куьчедихъ.
Къапудаллай къаравул паб,
Кьадар яшар авай дул паб-
Чlуру чинар ийиз туш къе.
Аксина,зун-хъуьрез-хъуьрез
Ттвазва рекье...
Худда ттуна машин гьаман
Акъатзава зун шегьредиз-
Машинривни агьалийрив ргазавай
Гур шегьердиз.
Тади галаз,ягъалмиш яз,
Са чарадан рекье гьатна,
Чlурна къайда за...машатна.
Легьзедани заз,гьа сят-
Чир жезава авур гъалат...
Мягьтел-мягьтел килигзава:
Чlур жезватlа адан сифат,
Чинин кlалуб?
Ваъ,вежинай жезвач адаз-
Къалгьуризни туш ама заз
Чапла гъилин кьулаллай тlуб...
Агакьзава идарадиз,
Салам гузва зи кlвалахдин,
За,юлдашриз.
Гевил шаддик жаваб гузва
Вириди заз,
Эгечlзава зунни кардик
Бахтавар яз...
Амма инал агакьайла...
Гьизва япуз сятдин зенг-
Яргъи,узун:
Зиринг-зиринг...
Хуьтягь жезва инал,ксун-
Кватзава ахварай зун...


24.09.17