***

СЮЕМЕ ЭЛИМИ

Сюеме Чегем элими,
Сюйгенча бала ананы,
Намыслыдыла хар бири –
Уллу, гитче адамлары.

Ариудула кёк таулары,
Бийикдиле акъ къаяла,
Бек сюеме мен аланы,
Мындан ариу жерле къайда?
               
Таулу Халкъым

Таулу халкъым, нарт халкъым,
Мени жюрек жарыгъым,
Ёхтемлигим – миллетим,
Тёрем, ахшы адетим.

Санга тенгши болургъа,
Неда ёшюн урургъа
Кюрешгендиле кёпле,
Алай тураса тёрде!


ТУМАН КЮН

Туман жерге дери жетип,
Таудан суучукъ келе кетип,
Эрип къалады анда –
Ма ол къалын туманда.

Анда букъгъан жомакъла,
Къызла болуп омакъла,
Жашла болуп жигитле,
Кюнню жомакъ этдиле.

Анда батыр атлыла,
Болуп ма къанатлыла,
Учадыла бийикде,
Отлайдыла кийикле.

Сюеме мен бу кюнню,
Къарап турсам бюгюнлю,
Эрикмейме, туманда
Не кёп бугъуп тургъанла.

Тёгерекде таула да,
Тау тюбюнде баула да,
Чегем сууу, къаяла…–
Бугъадыла туманда.

Болуп турса да алай,
Туман ичине къарай,
Кёреме мен хар нени –
Бу журт мениди, мени!

Таула, тёшле туман кийип,
Болурму жан мени кибик –
Туман кюнню  сюерге.
Жомакълагъа тюберге.

Байтугъанланы Исмаил