***

Чидани ваз,"дуст кас",дуствал вуч ятlа?
Бежагъат-акунвач ахварани гьич!
Иналай кьулухъни мад,заз кичlеда,
Азият чlугана,вуна чир хъийич.

Ваз "дуствал" гафунин мана чара я,
Асулдан-хьанач вун асла гъавурда.
Ваз адан манаяр гзаф пара я-
Гьарадаз вуна са чка жагъурда.

Авачир чкадал жуван менфят,
"Вуч дуствал авайд я",-вуна лугьуда.
Жез ятlан а гафун манадиз къенят,
Хьурай-жуван хийир жуваз хкуда!

Аквач вакай хийир садрани-садаз,
Атlай тупlуз садан уфни гуч вуна.
Амма дустарикай куьмек гуьзетиз,
Жеда вун гьамиша,буржли яз кьуна.

Аксина-дустарал пехилвалда на,
Дуст кlеве гьатайла,хвешивилерда.
Чинал кудай кьасар ийиз,далдада-
Рикlин къеняй шадвал ийиз,кьуьлерда.

Виш чин алайд я вал дустарин патав,
Гьарадаз са сифет къалгьурда вуна.
Саки ви паталай дуствал-са партал,
Гьар мярекатда сад жеда алукlна.

"Тапарар хъжедач мадни вавай заз",-
Фикириз авайла,йиф-югъ талгьана,
Къведа зинни патав,гъуьлягъдин мез гваз,
Амукьда "дуствилиз",зун,муьтlуьгъ хьана.

Вун авай чкада душман герек туш,
Акъудиз,душмандай кьилни-асант я.
Са душмандини чаз а ви зерер гуч,
Вун жедал,виш душман жен-мад хъсан я.