Хтанва мад хайи чилел,
Ракъинин нур алай кьилел ...
Эхь, ватандин михьи гьава,
Зи дердериз вун я дава...
Килигзава зун кьуд патаз,
Гьиссзава ватандин аваз,
Тух жезвач килигналди вил:
Вуч гуьрчег зи хайи чил!
Цуькверал ацукьнавай чиг,
Алмазривди жеда гекъиг...
Яраб ят1а пак цаварлай,
И гъетер савкьват гъуцарлай...
Дамах гвачир багъдин цуьквер,
Виридалай я чеб иер.
Экуьн кьиляй абрун атир,
Чк1ун тавур авач жигъир.
Къацу хъуьтуьл махпурд гамар
Эк1ягъна, гьазур я багълар.
Ч1ив-ч1ив ийиз хилел, таран,
Кутунва билбилри макьам.
Агьалияр ягъиз векьер
Чуьлда ава, кьазва туьквер
Гатун са йикъа, лугьуда,
Яргъи кьуьт1уьн каш ат1уда..
Зун хтанва вал кьил ч1угваз,
Рик1яй-рик1из вавди рахаз....
Кьезил ийиз заланвилер
Сагъар хъийиз дерин хирер...
Хтанва мад хайи чилел,
Ракъинин нур алай кьилел ...
Эхь, ватандин михьи гьава,
Зи дердериз я вун чара...
Хтанва мад хайи чилел...
© Copyright: Гасанова Гюзеля, 2017
Свидетельство о публикации №117061902651
Свидетельство о публикации №117061902651
Рецензии