Мад атанва зи уьмуьрдиз
нубатдин гатфар.
Жув гатфарин тавдавай хьиз,
гьиссзава пайгар.
Зиринг туш зи гатфарин кам,
ятуш астани.
Хкис хьанвач далуд ккул- кьам,
кьунвач асани.
Рик1е гьеле кузма ц1елхем,-
ц1ук1 хьиз ифенва.
Гевилдани мелгьем бегьем,-
дарман хьиз хвенва.
Аватнавач гьалдал бубат,
жезма к1валах-кар,-
Багъда къекъвез, салухъ гелкъвез -
алудиз йикъар.
Пудкъанни вад - зи агьил яш,
белке я гзаф!
Уьмуьр патал заиф туш каш,-
туш адаз хилаф!
Къужахдава и феслидин,-
хуп1 иер я чин,
Агьил яшдиз такьат,къуват,
хугузма ифин .
Уьмуьрдин гьал къвер-къвердивай
жезват1ан заиф,
Лугьудач за, мад са гатфар
алатна, гьайиф...
Вун хвашгелди зи уьмуьрдиз
нубатдин гатфар!
Ви къужахда, агьил касди,
гьиссзава пайгар!
2017
***
© Copyright: Фикрет Хидиров, 2017
Свидетельство о публикации №117051711010
Свидетельство о публикации №117051711010
Рецензии