Йикъар-гъетер на багъишай,
Зи уьмуьрдал къашар хьурай.
Лугьузва за чун танишай,
Булахдал мад къаншар хьурай.
Мад сеферда атанва зун,
Вун зи къвалал алачтlани.
Фикирри гьакl гатанва зун,
Вуна гаф заз ганачтlани.
Булахдай ви къамат акваз,
Баркаван яд гуьзгуь ятlа.
Зи чан кумир ви дерт аваз,
Рахух зав вун Дагъви ятlа.
Акунрилай вуч аслу я?
Физва йисар,бес за вучин?
Ви къаматдихъ тамарзлу я,
Къалура заз ви ачух чин.
Хтайлахъди це са салам,
Шаклу хиял гадра рикlяй.
Зи сефилвал квадра зи гъам,
Вегьемир на мад зун виляй.
Саймишнач на церин аваз,
Баят яни рикlин ризкьи?
Куьз рахазвач бахтарин саз,
Зун патал ам ятlа мискьи?
Алукьайла гатфар гуьзел,
Гада,за вин синихдани?
Лагьайтlа за ширин мецел,
На ви гьиссер чуьнуьхдани?
Чун киснавай, яд рахазва,
Кьисмет я жал чун вердишай.
Ингье, вири заз аквазва,
Йикъар-гъетер на багъишай.
Булахдал мад къаншар хьурай
© Copyright: Марьям Алискерова, 2017
Свидетельство о публикации №117051506320
Свидетельство о публикации №117051506320
Рецензии