АВА ХЬИ
Ч1ур хьанва мад дуьнядин гьал,
Гьарда санихъ ялзава хьи!
Инал-анал акъудиз къал,
Чил ивидив алзава хьи!
Югъ-къандивай акъудиз гьак1,
Сад-садалай гуж квай яракь,
Чиг уьмуьрар жезва зурак1,
Дидейрин рик1 палзава хьи.
Я Сад Аллагь, акъатдач кьил,
Гьим гьахъ ят1а, гьим я жагьил.
Кьилер ат1уз ава ИГИЛ,
Инсанрикай малзава хьи!
Вуч кар я им, ихьтин яраб,
Кутаз к1вачик афган, араб…
Амеркади вечре хьиз лап,
Дуьня кьеч1егъ-чалзава хьи!
Гьахъ хьанва хьи дуьнядал пул,
Гьам я кьуват, гьам я акьул.
Ам жибинда авайда бул,
Кесибдан рехъ салзава хьи!
Тапаррикай кьуна т1арат1,
Кхьиз тарих-вири гъалат1.
Гьахъ лугьурдаз лугьуз:-алат!-
Сив гут1аниз лалзава хьи!
13.06.2016
Ава хьи
© Copyright: Римма Гаджимурадова, 2017
Свидетельство о публикации №117050501971
Свидетельство о публикации №117050501971
Рецензии
Эхь,чан Римма вах,дуьз лугьузва вуна!
Пул авайдан гъиле вири ава,гьак1 ят1ани, абур тух жезвач.
Сельмина Курабекова 28.05.2017 21:43 • Заявить о нарушении
Пул авайдан гъиле вири ава,гьак1 ят1ани, абур тух жезвач.
Сельмина Курабекова 28.05.2017 21:43 • Заявить о нарушении