Марччар Махъв

                МАРЧЧАР
                (Махъв)
         Саб майдандиин марччари укI ипIури айи.  Мурарихьан ярхла дарди, хяран кюкйирин туз* йибтIури, илтIибкIру микI либцури шулу. МикIна марччар дустар вуйи. Фицики микIлу марччариз цIюхъюм йигъан манишин аьгь апIуз кюмек тувуйи.
       Хабарсузди марччаригъ жанавар гъябхьру. Диди марччариз кьацIар йивуру. Жанавриз фтихьан гучIуруш аьгъю илтIибкIру микIлу элбеэл мина инсандин сес хьади гъюру. Инсандин сес гъеебхьубси, жанавар гьебгру. МикI, чан дустар вуйи марччар ккадагъунза кIури, шад шулу. Вагь, фу лигурва! Гьебгнайи жанаврин кьяляхъди диди кьацIар кахьнайи марччарра жаргъури шулу. 
     «Чпиз дубхьнайи аьзабнаан мурариз жанавар марччси рябкъюра - йиз дустар дерккну ккунду», - фикир апIуру микIлу. Ва, чахьан шлу-даршлу кьувват уч дапIну, диди жанавар илтIибкIуру ва, шавлу дапIну, дипру.  Дуфну, жанаврилан илтIишну дийигъу марччариз микIлу: «Дустар,-  кIуру, - му ичв улихь хьайиб марчч дар, хъа учвук кьацIар кахьу жанавар ву; чикиди гьергай ва ичв уьмур уьбхяй! Узу думу учвухъ хъубкьуз гъитурдарза».
      Марччарикан сабра али йишвлан рибшвурдар, я мурари сабдира илра адабхъурдар.
     «Гьамлин гъарахай!» - гьарай апIуру микIлу. «Ккебехъ, - кIуру дидиз жанаври кIирар кахьнайи саб агълижи. - Жанаврик хъял капIдива. Диди, учура яв гафарихъди рази ву, пиди ва учкан гиран апIиди».
      МикI майдандиина хътабкуру. Марччар чпик кьацIар кахьнайи жанаврин кьяляхъди гъягъюру.



* Кюкйирин туз - пыльца.