Кlаник сув я,кьилелни цав-акъвазна са кукlушдал,
Пагь атана,амазма зун,вилер хьанва тупучlдал.
Элкъвез-элкъвез ири-гъвечlи,тик кукlушрин сыра я,
Такурди,зи чlалахъ жедач-и мензера чара я.
Агъа пата аквадайди лацу памбаг цифер я.
Саки чилел ацукьиз кlанз,чарх гузавай лифер я.
Цифер акьван мукьуз я хьи,агакьдайд я вегьей гъил,
Базан мумкин жеда акваз,самолетдай,и шикил.
Кlватlал-кlватlал циф я...кичlе жеда гьатта мецел гъиз-
Хкадариз кlанзава заз,винел...хъуьтуьл месел хьиз...
На лугьуди,твадай вахт тир,лацу хипен суьруь я,
Суван кlуфар чубанар я-буяр са кlус куьруь я...
Белки циф туш-ам,акьуллу,агьил касдин чlарар я?
Чархарни а-гишин хьанвай са тимсагьдин сарар я!
Ракъун нурар,цифед винел,рапlрапlиз я-экверив,
Гьатиз чина экверин хъен,чархар кьазва цуькери.
Вили цав я амай вири,кьуд пад кьакьан бушлух я,
Саки са вил,къаравул хуьз,ала чилин къуллугъдал.
Са пейзаж...
© Copyright: Намик Фарзалиев, 2017
Свидетельство о публикации №117042805717
Свидетельство о публикации №117042805717
Рецензии