Ихтилат

Шаламаригъ гъятIлар гъярчну сар аба,
Гьяракатнаъ ахъну гьяса ккутIубкьури,
Умуд кивну, райондиз гъягъюрайи
Гьякимдихьна, гъуллугъ гьял апIур, кIури.

Касиб гъяркъган гегми дапIну чан улар,
Гашун хюрчаъ заву айи ппаздиси,
Машнакканра ккадахъну вари рангар
Хъял кади столихъ деъна му паччагьси.

Фу бала алабхънаш лигай йиз кIул’ин!
Узу дартмиш мапIан, мажал адарзуз.
Махьан багахь деленчивал апIури,
Деллу духьнаш, мурар узуз аьгъдарзуз.

Бахтлу байвалкьан дярябкъю бейнава,
Мужрийилан хил аьлдяхюри пашманди,
Дарпиди чIалра, дапIнайиган авара
Кьяляхъ гъахьну раккнихьна му явашди.

ГьапIуз аьзаб туврава кIваз кьабирин?
Гъайгъушнаъ дугъан хьуб яв буржи дарин?
Аьзиятнаъ дуланмиш шулай халкьдин,
Гьардин важиб тамам дапIну ккундарин?

Хифран гъянси кIару дубхьна му яв юкIв.
Дюднигъ кIураб гъютIюбкьнайи жанавар.
Фици гъюруш агъдарзуз увуз зат нивкI,
Яв халкьарин дургнайиган багърумар!

ГвачIиндихъ хябяхъ хъайиб хабар дарин
Увуз, дагъдихъ ккебкрайиган аку ригъ?
Лазим ву, якьин, гьякимрин дицирин,
ТIурин гъябчуб ижмиди лап кIарчаригъ.

Инсанарин тадабгъури пул-девлет,
ГъапIуб гьярамвалиинди гъазанмиш,
Хьибдар дицирин хизандиъ берекет,
Хьибдар дициб уж’валра апIру дадмиш.

Хъебехъ йиз бай, гафарин гъавриъ духьну,
Дицир залумкар инсан ву гьич махьан!
Халра яв букъ ккайи рягъинси дубхьну,
Шулвуз бегьер, инсанвал кIваъ терг мапIан.