Гатфарин рагъ - ц1ун к1вале Хуруганни алук1на...

Апрелдин варз-жив къецел
Мит1яй ягъдай ацукьна.
Гатфарин рагъ - ц1ун к1вале
Хуруганни алук1на...

Чайдандай бугъ акъатиз
Уьфт ягъзава дат1ана
Тади ква лап  агатиз,
Хзандик зи – атана!

Чар авай фу суфрадал,
Ниси, гъери, мукашни…
Вегьен тийин пакадал,
Ша, алцуррин и кашни.

Базардин югъ атайла,
Галайвилер квехъ ийин.
Амай йикъар лагьайла,
Агакьзавач за гьик1ин.

Таза дуьдгъвер элягъна
Фу итимдив вугузва.
- Неъ, чан бала, нуш хьурай!-
За гададиз лугьузва.

Лугьуз-хъуьрез суфрадихъ
Зарафатрал илигда.
Элкъвена зун гададихъ,
Милаимдиз килигда:

- Бес жедани, чан бала,
Меселаяр гьал тийиз:
Мус аквада свас гъана -
Ракъинин нур вилериз?

Бубадини сидкьидай,
Рик1ин мурад лугьуда:
Ц1ийи сваса  чай цана,
Бес мус гъиле вугуда.

Агь, чан буба! чан диде!
Гьар базардиз са гафар…
Секиндиз чай хъваз гице,
Сифте хьурай чаз гатфар.

Дак1ардаллай цуькверни
Гьейран хьанва чун акур,
Яру абрун хъуьхъверни
Мукьвал жез я чахъ гьазур.

Чи ц1ун к1валин кьуд пип1ез
Ракъин нурар аватна…
Милаим чал вил вегьез,
Гатфар мукьув  агатна.

Т1ебиат, на кич1ерар
Гайит1ани апрелдиз,
Гъуьргъуь хьанвай гьечерар
Элкъуьриз жеч гъезелдиз.

Апрелдин варз-жив къецел
Мит1яй ягъдай ацукьна.
Гатфарин рагъ - ц1ун к1вале
Хуруганни алук1на...
16.04.2017