Зунни вун тир...векьин тала,къацуни тарар,
Гатфарин цlиг...агъванавай чими,куьлуь гар.
Ягъиз гару,цикlирзавай ви хъуьтуьл чlарар-
Акьаз абур зи чинив-зи руьгь юзурзавай,
Заз бахтуни са женнетдин багъ гьазурнавай.
Зунни вун тир...рахазвайдни вун тир илигна,
Са вуч ятlа къалурзавай базан гъилиг,на-
Суьгьуьрдавай хьиз,ви гъилин туьшдиз килигна,
Амазвай зун,акун тийиз ана са затlни...
Бахтавар тир-заз амачир мад са мурадни.
Зуни вун тир...пад-къерехда кузвай бубуяр,
На заз ганай,кьил эцигиз метел,ихтияр...
"Куьтягь тахьуй,уьмуьрлух хьуй чи и легьзеяр,"-
Лугьузни за,тlалабзавай сад аллагьдивай,
Амма...тик-так...чи сятрик са тади квай.
...Зунни вун тир...садни къацу жезавай тlам,тар,
Кьуд пата цуьк...майдин вацра кьунавай къарар.
Чими гару цикlирзавай ви хъуьтуьл чlарар-
Хкlуризни зи чиник,зи руьгь юзурзавай,
Заз бахтуни са женнетдин багъ гьазурнавай.
***
© Copyright: Намик Фарзалиев, 2017
Свидетельство о публикации №117040802030
Свидетельство о публикации №117040802030
Рецензии