***

Мугьман я зун мадни хайи макандиз,
Чин ахъайна,хъуьрезва заз дагъларни.
Хъфенвай зун инай кlанзни-дакlандиз,
Са гатфарихъ-цуькведамаз багъларни.

Рикl михьи я и чилерин,чкайрин,
Хъел хуьз авач-туна текдиз чеб,лугьуз.
Батlул я зун-гзаф вахтар,сакlани
Хуьквез тежез авай,садра кьил чlугваз.

Шад я зун,мад акуналди хайи чил,
Гьар камунал лезги рахун гьизва заз.
Агатиз зав,хуьруьнвияр-гузва гъил,
Са-садавай ава чун кеф-гьал жузаз.

Ажеб хьанвай и легьзейрихъ зун дарих,
И гуьрушрихъ-багъри элдихъ галазни.
Гила гьиссна-хьанвай чlал зун хупl къарих,
Хайи чилихъ-чилини икl ялда кьван.

Яд къайи я ргазавай булахдин,
Мекв ацlурна,са хупlзава гьаман за.
Тандиз кьвезва серинвилер-яйлахдин,
Хъфиз инай-вуч гъалатна,аман,за!?

Кьил кьаз тахьай са ашкъидин шагьид яз,
Кьуранава хушдин кьилел-мегъуьн тар.
Адан кlаник-алукьнаваз цlийи варз,
Са руша заз лагьайди тир вичин тlвар...

Зун хьтинбур гзаф ава дуьньяда,
Чкlанава,цlар-цlар хьана,яргъариз.
Садаз чидач,Ватан вуч я-бинедай,
Сад я,лугьуз ам,ацукьиз-къарагъиз.

Нянихъ вири алтlуш хьана кимелла,
Инал жеда хуьруьн асул гуьруьшар.
Галчlур жезва,лаш вегьена къуьнелай,
Хуьруьн чубан,мал-хеб гваз,уьруьшрай.

Дагъдин гьава,булахдин яд,вацlун ван,
Умунардай са мелгьем я зи чандиз.
Чарасуз яз гъурбат хьанва зи макан,
Акъатзава рикl-хтунихъ,Ватандиз.

Чилин цlигелвал хьиз-рикlик акатдай
Аватlа жал и дуьньяда са дерди?
Тек са югъ за,хайи чилел акъатдай,
Дегишдайни гъурбатдин са уьмуьрдихъ?

Икl хьана зи уьмуьрдин пай-зи бахтни,
Ватан са кьил,къурбат хьана муькуь кьил.
Тек са шеъ заз кlанда-чара са затlни,
Суруз хьайтlан,зи,кьисмет хьуй хайи чил.


18.03.16