Къацу назик танар-пешер,
Юкьва ава - вили вилер,
Ислягь цавун рангун - гъетер...
Вуч иер я мулдинцуьквер!
Килигзава милиз-милиз,
Кьил патална, кич1ез-регъуьз,
Вегьез муькъвер рик1яй-рик1из ...
Вуч иер я мулдинцуьквер!
Чун, рушар, чуьллериз фидай,
Дамахдивди к1унч1ар гъидай.
Хуш атир к1вализ чк1идай...
Вуч иер я мулдинцуьквер...
Нур гудай квар аваз къуьне,
Зун булахдал физвай рекье,
Куьк1уьрай гьиссер зи рик1е ,
Вуч иер я мулдинцуьквер...
Т1ебиатдин савкьват-бегьер,
Жегьилвилин хуьзвай сирер,
Зи гатфарин кьет1ен эквер...
Вуч иер я мулдинцуьквер!
Мулдин цуьквер!
© Copyright: Гасанова Гюзеля, 2017
Свидетельство о публикации №117032310924
Свидетельство о публикации №117032310924
Рецензии