Туш зи вежинайни дуьнья-гьаваян,
Гафарин алем заз гьар са куьнай я.
Садни зун чlалахъ я ашкъидин,кьакьан,
Залай элячlиртlа ам-зи гуьнагь я.
Кlандач къалабулух майданарни заз,
Рикlевай гаф лугьуз,ччар я зи майдан.
Кlалубдин,чешнедин къайдаяр такваз,
Чкадал лагьанвай чlал я зи майдан.
Ни вуч фикирзатlа закай-авурай,
Къайгъудайни туш-заз жуван рехъ ава.
Зи виждан захъ галаз декlен дуьз хьурай,
За чlуру фикирар фадлай негьнава.
Даим пад-къерехдиз килигиз:-Акван!
Вил ягъиз,кичlе жез-туш им зи кьисмет.
Мецелни рикlе зи,са гаф жеда кьван,
Кьве чин авайбуриз гудач за къимет.
Ялтахвал,пехилвал,дуст маса гунар-
Кьунач за хесет хьиз жуваз садрани.
Лугьуз туш за,им я чlехи тир гьунар,
Им зи яшайишдин къайда я-ади.
Хайи чlал кьуна за гьамиша вине,
Хайи чlал рикlеваз за яшамишна.
Зи бубайри гьикlа кьуна зи бине-
Заз абрун несигьат даим юлдаш я.
09.01.17 г.
***
© Copyright: Намик Фарзалиев, 2017
Свидетельство о публикации №117032204499
Свидетельство о публикации №117032204499
Рецензии