Хайи лезги чил

Ийер я гзаф,
Дагъ,дуьгуьн,дуьз,чlаф.
Мецин верци гаф-
Хайи лезги чил.

Цаварин савкьат,
Чи гуж,чи къуват.
Са ийер тават-
Хайи лезги чил.

Халкьдин дувул,тагъ,
Экв,чим гудай рагъ.
Намусдин пайдагъ-
Хайи лезги чил.

Серин яйлахар,
Къайи булахар.
Хци тир рагар-
Хайи лезги чил.

Дагъ,сув я са кьил,
Са кьил-вили гьуьл.
Чи рузи,фу,къуьл-
Хайи лезги чил.

Цуьк я-чилерин,
Экв я-вилерин.
Чан зи эллерин-
Хайи лезги чил.

Лекь элкъвез кьилел,
Мирг-суван пелел.
Шарвилидин гел-
Хайи лезги чил.

Чан хайи макан,
Вун я руьгь зи,чан...
Дидед гайи тlан-
Хайи лезги чил.

Бубайрин веси,
Дидед чlал-верци.
Са къизил-гъвечlи,
Хайи лезги чил.

Жигердиз-нефес,
Къелемдиз-гьевес.
Захъ авай ван,сес-
Хайи лезги чил.

Агьилни кьуьзек,
Жегьилни бицlек.
Тамир куьне тек-
Хайи лезги чил.

Кьил-кьиле вугуз,
Шагьдагъни Шалбуз...
Тамукьрай ялгъуз-
Хайи лезги чил.

Агатмир,душман,
Акъатда ви чан.
Халкь ви-къагьриман...
Хайи лезги чил.

Ша чун дуьз рахан,
Стхаяр,вахар.
Чун жедан-тахьай
Хайи лезги чил!?

Кьулан вацl я физ,
Чун пайиз-пайиз...
Гьикl лугьун дерт...низ-
Хайи лезги чил!?

Гъурбатраватlан,
Вид я заллай чан.
Чан азиз Ватан-
Хайи лезги чил.


26.01.17 г.