***

Япунжи гьалдна винел,
Кьакьан са дагъдин синел
Ксанава Шарвили,
Алаз чинал хвер,мили.

Вуч я акваз,ахвара:
Гатфар хьанва дагълара.
Кьуд пад яру цуькер я,
Манияриз,нуькlер я.

Къацу хьанва дере,дагъ,
Вили цава кузва рагъ.
Эллерни шад,кубан я,
Вич,буба хьиз,чубан я.

Акай хьанва синерал,
Хипен,яргъи суьруьяр.
Къванер вегьиз бицlекри,
Хъел кутазва кицlерик.

Меслят гуз,агьилри,
Цанар цузва жегьилри.
Хуьтягь хьанва дявеяр,
Ислягьвалин гьава я.

Тади галаз папарик,
Ква кlвалин крарик.
Садбури фу чразва,
Садбури гам хразва.

Булахдилай,рушари,
Яд гъизава,кварарив.
Элда са мел-мехъер я,
Вилиз такур сегьер я.

А рушарик сад ква,
Лап ийер са тават я.
Шарвилидиз килигиз,
Хъуьрезва ам,пери хьиз.

Бахтавар я Шарвили-
Гапур туш-лаш я гъиле.
Секин я ам аял хьиз,
Ацlакьнава-ял ягъиз...

Садлагьана аквазва,
Диде-са кlус яргъаз я.
Чина са тешвиш ава,
Адан чандик кичl ква.

Эвер гузва дидеди:
"Кьунва кьуд пад ягъиди.
Къарагъа,хва,фад ая,
Душманар барбатl ая!"

Кватзава ахварай,
Лезги халкьдин игит хва.
Викlегьвилин генгинив,
Къарагъзава женгиниз.

Гъиле гьуьлдандин гапур,
Душманрин цlиргъ ийиз чlур,
Шарвилид гьужумзава,
Абрун дуьне гумзава.

Акунайтlа,кешкена-
Вегьизва леш лешинал.
Ада халкь мад садзава-
Душманар барбатlзава!

05/01/17