Гатфар

Гатфар къвезва,вичин чими нефес гваз,
Ахъа жезва чилин чlагай дамарар.
Чlагунариз,акъвазнава гьазур яз,
Тlебиатни-хкадариз ахварай.

Акваз-такваз цlразава живерни,
Акъатзава винел-чилин гачалар.
Ажуз хьанва кьуьд,кьан тийиз хивени-
Ам гатфари ярхарзава кlвачелай.

Агакьнава серт къайарин эхирар,
Чими бугъар хкаж жезва чилерай.
Малум жезва дар,накьвадин жигъирар,
А жигъирар-кьуьд катзавай гелер я.

Цlразватlан са патахъай,амазва-
Никин винел,гьеле лацу халича.
Инлай-анлай зулун къацар аквазва,
Живед чиниз гузни къацу нехишар.

Экlя хьанва къецlил жезвай гуьнеяр.
Живед ятар авахьзава ямажрай.
На лугьуди,им са цlийи дуьнья я-
Дегиш хьанва,иски сифет алажна.

Амма дагълар,хена вичин такаббур,
Тади кьаз туш,лацу бармак хтуназ.
Акъудзавай хьиз синагъдай,чи сабур,
"Хкведа кьуьд мад!",-кичlерар гузва чаз.

Хупlни ийер,верцlи я и легьзеяр,
Мугьуббатди цlир ахъайдай-рикlера.
Лугьуз канда-яшайиш вуч гуьзел я,
Садрани циф тагьхьурай чи рекьера.

Гатфар къвезва,атирар гваз,ашкъидин,
Са суьгьуьрдин,аламатдин сегьне я.
Чка авач и сегьнеда,нашидиз,
Экьечlрай-нин рикl гьевесрин дегьне я.




22.02.17 г.
--