ОНБИР ЖЫЛ
Заман дегенинг не барады учуп:
Къарап къарагъынчы бошайма окъуп.
Сау къалыгъыз, школ, окъуучу тенглерим, -
Сау онбир жылны бери жол тепледим.
Ахыр къонгуроу зынгырдап бошады,
Дерсде олтуруу да бизни бошлады,
Бери уа турурбуз келе эм кете,
Сабий заманны, бу школну эсгере.
Жолгъа ашырасыз бизни, устазла,
Элге къайытырбыз, болуп устала.
Къыйын салдыгъыз къыйналып,кюрешип.
Бизни игилик этерге юйретип,
Тилейме сизге мен саулукъ, рахатлыкъ,
Къуру да турсун насыплы танг атып
Бу сиз жашагъан огъурлу элимде,
Къайсын жырлагъан огъурлу Чегемде.
Школум, босагъанг – билимге кёпюрюм,
Сени сыйынгы бийикге кётюрюп,
Къайда да иги бла айтырча бизни
Алай жюрютюрбюз биз кесибизни.
Бизге къанатла берген тау журтубуз,
Сенича бийикди да умутубуз,
Барырбыз аны бардыра жашауда.
Билексе бизге сен жолла башлауда.
Байтугъанланы Исмаил
Школе
© Copyright: Исмаил Бейтуганов, 2017
Свидетельство о публикации №117021911658
Свидетельство о публикации №117021911658
Рецензии