Бабушке

НЯНЯЧЫГЪЫМА

Алтын Нянячыгъыбыз, 
Бизни кёз жарыгъыбыз,   
Кюнню къарангы этдинг,
Чарсха кирдинг да кетдинг.

Биз жилядыкъ, сарнадыкъ,         
Жаныбызны къармадыкъ,
Кёз жашланы тауусдукъ. 
Насып кетди ауушну.

Сени топракъгъа салдыкъ,
Ачы кюн сенсиз къалдыкъ.
Кюнюбюз болду къара,
Тангыбыз кюнсюз ата.

Сен болмагъан юйге мен
Къалай барайым? Айт сен -
Неге да билген жууап.
Кетгенсе, ёлюм къууа.

Танг атдырмайын кетдинг,
Няням, сен къалай этдинг
Барыбызны да ёксюз?!
Биз сенсиз – ётсюз, кёлсюз.

Тынгысыз эди кече,
Къоркъууу жаннга кёче.
Кетгенсе сен къайтмазгъа,
Бизге ариу айтмазгъа.

Сабийле, туудукъларынг,
Эгечле, жууукъларынг –
Бары да болуп мудах,
Ма алай келди палах.

Жарлы этдинг сен бизни –  
Тийрени, элибизни
Къоюп, кирдинг чарслагъа.
Хорлатдынг да тасхагъа.  

Насийхатларынг сени
Дерслеримдиле мени.
Соруу берсем кесиме,
Тюшесе сен эсиме.

Сени бла олтуруп,
Болмазлыкъны болдуруп,
Энтта айтама хапар.
Энтта табама мадар…

 «Нянягъа бир барайым,
Тургъанына къарайым», –
Деп, келе турдум, жокълай.
Сен да арбазда сакълай.

Энди кимге келейим?
Ким бла бирге кюлейим,
Жюрекдегими санай?
Мудахма бюгюн алай.

Жукъ келмейди къолумдан,
Кетип баргъан жолунгда
Тилейме шош Аллахдан
Сакъласын деп палахдан.

Жаннет чыпчыгъы этсин,
Жаннетле тёрюн берсин
Мени Нянячыгъыма,
Сюйген ынначыгъыма!

Обанг болсун жумушакъ!
Жанынг, ниетинг да – акъ,
Кёкден къарайса бизге,
Жиляйма, назму тизе.

БАЙТУГЪАНЛАНЫ Исмаил.