Туугъаны бла бирге келген фахму О молодом поэте

        Туугъаны бла бирге келген фахму
 Тебен Чегемни орта школуну окъуучусу, Байтуугъанланы Исмайылны республикалы эм район газетледе  басамаланнган материалларын   сюйюп окъуйма. Нек дегенде  биз бир эллилебиз,   анга дерс берген устазланы бир къаууму мени да окъутхандыла, юйретгендиле жашауда керекли  затлагъа.  Ма, ол себепден къууанама он сегиз жылы толмагъан жашчыкъны жазгъан затчыкъларына, бек башы уа- аны адеплилигине, адамгъа хурмет эте билгенине. Быллай сёзлени элде кёпледен эшитгенме. Жашны атасын, анасын,    аппасын, ынналарын да иги таныйма. Баям,  аладан да бир зат алгъан болур ол. Алай, мен оюм этгенден, анга фахму  туугъаны бла келегенди.  Болады, жашауда алай да.
Исмайыл келир жыл школну бошарыкъды. Элни жамауат ишине къатышханына къарасанг, анга бир киши да айтырыкъ тюйлдю бу окъуучуду деп. Дерсле бошалгъандан сора,  маданият юйде тюрлю-тюрлю жыйылыуланы бардырыргъа, школда адабият ингирлени ётдюрюрге, республиканы белгили адамлары бла тюбешиулени къураргъа арымагъанлай, талмагъанлай  болушады дайым. Ол угъай эсе, анда болгъан затланы юсюнден терк окъуна материал жазып, ариу, тап суратла  да алып, аланы республикалы «Заман» эм районну «Голос Чегема»  газетлерине ашырады.
Школну къаабыргъа газетин жарашдыра турама, бир къарачы деп,  манга да элетрон почта бла бир ненча кере материалла жибергенди.Ол алада окъуучуланы юсюнден айтып къоймай, белгили жазыучуларыбызны  юбилейлерине жораланнган бетле да жарашдырады.  Ма аллай ётгюр, хар жерде да хайыр келтирирге итиннген жашды ол.  Башха тюйюлдю, Исмайыл жашауунда къайсы усталыкъны сайласа да,   этген муратына жетерикди, мен акъыл этгенден.   
Жазыучлукъ ишге тартылгъаны себепли,  Басманы юйюне  терк-терк келиучюдю. Кабинетиме да кирип, элни юсюнден хапар да айтып,  «Заманны» журналистлерине да  тюбеп, кёп тюрлю соруула бериучюдю.  Бу жашчыкъ хар затны да билирге сюйген, бек башы уа жууаплылыкъны  сезген, алгъа итиннген окъуучуду.
    Чегем районда эм республика да чыгъармачылыкъ жаны бла бардырылгъан тюрлю-тюрлю эришиулеге тири къатышады. «Голос Чегема»  газетде  «Жашна, Малкъарым!»,   «Религия и толерантность»,  «Ана тилде эм иги радио бериу» деген республика даражалы конкурслада  алчы жерлени алгъанды. Волонтёр иш  бла кюрешгени ючюн районну администрациясыны башчысыны сыйлы грамотасы бла да саугъаланнганды эм «Къайсыннга жюз атлам»  фондну бюсюреу къагъытын  да бергендиле анга.
  Кёп болмай, чегемли жаш,    тюрк миллетлени араларында бардырылгъан Махмуд Аль Кашгарлы  халкъла аралы конкурсну  саугъасы  къоллу болгъанды.    КъМР-ни  Басма эм асламлы коммуникацияла жаны  бла къырал комитети  эм Журналистлерини союзу бирге бардыргъан «Акулы пера» школну айырмалы бошагъанды.
   Белгилерчады,   быйыл Исмайылны  «Атламла» деген   биринчи назму жыйымдыкъчыгъы чыкъгъанын. Ол жыл санда  чыгъармачылыкъ жаны бла аллай магъаналы  ишни этереге кёпле базынмазла. Китапчыгъында Исмайыл туугъан жерине сюймеклигин жашырмайды, адамлыкъны эм башха салады.   Ёсюп келген, аллай  таза ниети болгъан  жаш эллим бла ёхтемленеме.
Сиз къолугъузда  турхан китабында Исмайыл кёчгюнчюлюкден сора таулуланы жашау турмушларын, Уллу Ата журт урушха кетген жашларыбызны эм аланы юйюрлерини къадарларыны юсюнден хапарлайды.   Ата журтха, элине, туугъан жерине сюймеклигин неден да бек багъалагъанын суратлайды. Китапны экинчи кесегинде жаш фахму ёмюрлюк теманы- сюймекликни юсюнден айтады. Керти сюймеклик болгъанын. Быллай теманы алгъаны да сейир тюйюлмюдю жигитни.
 Сюйгенди сени жюрегим,
 Эсдеди санга жетгеним,
 Чапханлай келеме санга,
 Къууанып чыгъама тангнга.
 Сен киргенсе да жаныма,
Кюч бергенсе да къаныма
Ючюнчю кесеги уа-жашауда бола тургъан затланы юсюнденди. Аланы жаланда ашыкъмагъанлай, кёл салып окъургъа керекди.
Фахмунг мындан арысында да ёсе барсын, Исмайыл. Этген ишлеринг бла, жазгъан материалларынг бла окъуучуланы къууандыруучу бол.

Къонакъланы Хасан,                Къабарты-Малкъар Республиканы Басма эм асламлы коммуникацияла жаны бла къырал комитетини председателини заместители,
КъМР-ни сыйлы журналисти.