О поэте - балкарские поэты!

Ахшы жолгъа бар!

Байтуугъанланы Исмайыл алыкъа жаш адамды, ол Тёбен Чегемде туугъанды,  закий Къайсынны атын жюрютген школну онунчу классыны окъуучусуду. Жаш адам болуп, алгъа атламлары тиридиле, бир эллиле болгъаныбыз себепли, ол мени бютюн бек къууандырады.  Исмайылны хар неге хунери уллуду.  Ол назму, хапар жазаргъа, жырларгъа, тепсерге да устады.
Къолларына къалам алгъанла, кеслери сюйген жазыучуланы эниклей баргъанлары эсленеди. Исмайыл кесича жазады, дуниягъа кеси къарамы бла баргъан жашды. Ол жаш адамны фахмусу, хунери, жюрек тартыныуу, илхамы болгъанын чертген шартладыла.
Исмайыл  назмучулукъ бла бек гитчелигинден кюрешип башлагъанды. Кесин таныгъынчы, «Нюр» журналны бетлеринде Исмайылны назмуларын, хапарларын  окъугъанбыз. Бюгюнлюкде Исмайылны жазгъанлары  Къабарты-Малкъарны «Заман», Чегем  районну газетлеринде, «Минги тау», «Нюр» журналланы бетлеринде  басмаланадыла. Кёп  тюрлю эришиуледе алчы жерлени алады.  Кеси арабызда, ишни юсюнде Исмайылгъа махтау салабыз, хунерине къууанабыз. Эринмей, эрикмей  кюрешсе, иши тап барлыгъына ийнанабыз. Исмайыл кесини сюйген элини, эллилерини юслеринден жазаргъа сюйгени мени бек къууандырады.
Кеси да кёп болмай жаш журналистлени «Акулы пера» деген курсларын жетишимли бошагъанды, анда анга кёпле ыразылыкъларын билдире,  чынтты жазыучу боллугъун да айтып, къууандыргъандыла. Бюгюн мен Исмайылгъа, бек ышаннганымы бла базыннганымы билдире, Аллах онг берсин, жашауунг кесинг сюйгенлей болсун дерге сюеме.  Мен, сени бир  эллингча, не заманда да къатынгда болургъа айтама.
Исмайылгъа, биринчи китабын: «Ахшы жолгъа бар!» - деп ашыра, энчи насып тилей, жашауунгдан  къууан дейме.
   
Шауаланы (Габоланы) Разият,
КъМР-ни сыйлы журналисти


БИРИНЧИ КИТАП

Бу китап Исмайылны биринчи назму жыйым-дыгъыды.
Биринчи китап… Ол хар нени да башыды – андан ары барлыкъ жолунгу, айтыр сёзюнгю, жюрек итиниулюгюнгю, къадарынгы, жашау ызынгы… Аны бла сен, жазыучу, окъуучуладан алгъа кесинге багъа бичесе. Чагъы келип, айтыр сёзюм эшитилирге керекди дуниягъа деп, назмуларынгы бир бири ызындан тизип, жюрек ыразылыгъынгы, таралыуларынгы, оюмларынгы,  сени бийлеп тургъан къайгъыларынгы айтаса.
Исмайылда Ата журтха, аны табийгъатына сюймеклик уллуду. Ол биринчи назмуларын туугъан жерине атагъаны да анданды. Туугъан жеринги топурагъы, агъачы, адамы да санга багъалы эселе, сен аны къайгъысын кёре эсенг, игисине – къууана, ачыууна жарсый биле эсенг, сора халкъ уланыса.  Аны айтханым, Исмайылны назмуларында кюйле да тюбейдиле. Сёз ючюн, аманлыкъчыланы къолларындан жоюлгъан Геккиланы Казбекге аталгъан назму.
Чегем жери дуниягъа кёп ахшы адам бергенди. Кавказны биринчи Жигити Байсолтанланы Алим анданды. Андандыла закий Къайсын да, Шахмырза да, халкъ ийнагъы, «Балкария» ансамбльни къурагъан Къудайланы Мухтар да… Аллай адамла жашагъан жерде жашау дерсле, адабият дерсле да алыргъа итиннген Исмайыл не жаны бла да юлгюлюдю: тизгинли, намыслы, неге да юйренирге  талпыннган, нени да билирге кюрешген, таукел, жумушакъ сёзлю, халал. Ол затла бек къууандырадыла. Исмайылны ёсдюрген ата-ана махтаугъа тий-ишлидиле. Бюгюн, жарсыугъа: «Малкъар тил бизге неге керекди?!» – деп, сабийлерине аны окъутургъа унамагъан таулу ата-анала тюбейдиле. Миллетини келир кюнюне къайгъырыу юйюрден башланады. Аллах ыразы болсун Исмайылны туугъан жерине, миллетине, ана тилине да быллай сюймекликде ёсдюрген адамлагъа.
Бу жаш адамны аллында узун да, узакъ да жолла жатадыла. Сайлагъанынг кесинге, элинге, миллетинге да къууанч келтирсин, Исмайыл!

Назмучу Мусукаланы Сакинат