ТАУЛУ ХАЛКЪЫМ
Кёп палахдан ётген таулу миллетим,
Хыянаты болмай тургъан адамгъа,
Санга бирле зарлыгъы келди, жетди –
Тюз ниетли, татлы тилли Малкъаргъа.
Тынч жашагъан жерлеринден кёчюрюп,
Орта Азиягъа элтип атдыла.
Тау элледе чыракъланы ёчюрюп,
Къабырлагъа узакълада жатдыла.
Жигит халкъым! Тапсыз кесамат бла
Жокъ этдиле миллетими игисин.
Ма бюгюн а ныгъышда тургъан къартла
Онюч жылны этедиле тизмесин.
Ала жиляй, айтадыла хапарын
Таулу халкъны, анга балхам табылмаз.
Миллетими ачый тургъан жарасы
Бир заманда унутулмаз, жабылмаз.
8-чи март бизни ынналагъа
Эм бушуулу кюн болгъаны туурады.
Жапсарыу сёз табалмайын алагъа,
Жюрек андан мудах боуп турады.
Кёп къыйынлыкъ кёрген эсе да халкъым,
Палахладан кесин сакълап ётгенди.
Ол тёзюмню кёрюнюп тура хакъы –
Таулу жерде къайтып тёлю ёсгенди!
Байтугъанланы Исмаил
***
© Copyright: Исмаил Бейтуганов, 2016
Свидетельство о публикации №116122410764
Свидетельство о публикации №116122410764
Рецензии