Низами Гянджеви. Хосров и Ширин

Хосрова жузуна: «Гьинай я, жаван?»
Фергьада : «Зи макан-дустарин ватан.»
Лагьана: «Ана вуч сенятар ава?»
Лагьана: « Гъам къачуз, чан маса гузва.»
Лагьана: «Чанар гун эдебдикай туш.»
Лагьана : «КIанидаз ажеб тушни хуш.»
Лагьана: «РикIивай яни ви гъамар?»
Лагьана: «РикI вуча, им- чандин къарар.»
Лагьана: «Ваз икьван азиз я Ширин?»
Лагьана: «Эхь, ам заз чандилай ширин.»
Лагьана: «Ам  варз хьиз  аквазвани  ваз?»
Лагьана: «Ксунни зун ам рикIеваз?»
Лагьана: «Мус  жеда  рикIяй акъудун?»
Лагьана: «Накьвадик  фейи  чIавуз зун.»
Лагьана: «ГьахьайтIа вун кIвализ бирдан ?»
Лагьана: «Жеда зи кьил квачIел адан.»
Лагьана: «Вилел ви хирер ийида...»
Лагьана: «Муькуьдни вахгана фида.»
Лагьана: «Садан гъил фейитIа адал?»
Лагьана: «Лап къванни  ракьуни хада»
Лагьана: «Мумкин туш ви гъил  агакьун.»
Лагьана: «Хъсан я варз яргъай акун.»
Лагьана: «Чан къачун хьайитIа жаза?»
Лагьана: «Минетна, фад гуда  ам за»
Лагьана: «Лазим я, белкини ви кьил?»
Лагьана: «Кьил гуда ,къачудач за гъил.»
Лагьана: «КIан жемир ваз и дуствилер.»
Лагьана: «Дустари ийидач хъилер.»
Лагьана: "Секин хьухь, ви  хиял  хам я.»
Лагьана: «Секинвал зазни гьарам я.»
Лагьана: «Це вуна, сабурдив къарар.»
Лагьана: «Зи чанди кьабулдач и кар.»
Лагьана: «Сабурдик  хийир  пара ква.»
Лагьана: «Амач заз рикI сабур авай.»
Лагьана: «Гьи гъам я кичIезвайди ваз?
Лагьана: «Тек  гьижран кичIевал я  заз.»
Лагьана: «КIандани дердериз шерик?»
Лагьана:  «Герек туш заз авун чан- рикI.»
Шагьдивай гуз хьанач жаваб Фергьадаз,
Ам инал ихтилат мажбур  хьана таз.
Лагьана : «Икьван гагь жаваб гьазур  тир,
Ихьтин гафун устIар акурди тушир.
Къизилар кIан хьанач, гьакI  туна фена,
Гила ам  къванцивди синагъда чна.»
Ахпа гафар туна  гапурдив  кацIа,
Кутуна къванерик алмаздин каца.
Лагьана: « ЧIехи дагъ  ала чи рекьел,
Четин я инсанриз акъатун пелел.
Рехъ кутун герек я атIуз сувун кьил,
Физ-хтун а патай  жедайвал кьезил.
Алакьдач гьардавай, умуд гала вахъ,
Вирида лугьузва, тек вахъ я чIалахъ.
Ширинан ашкъидиз –пак  кIанивилиз,
Кьин кьазва, килиг гьа, за итимди хьиз!
Авуна и кIвалах, хъия мад арза ,
Вун ахпа мураддив агакьарда за.»
Лагьана ракьун гъил  галай Фергьада:
«Дагъдай  рекьер атIун за хиве кьада,
Амма  шартIар ава: яб це, заз са чIар,
Кьилиз акъудайтIа шагьди лагьай кар,               
Рази ийидани  ада  зи гуьгьуьл,
А ширин ярдилай къачуналди  гъил?!»
Шагьдик хъел акатна  идакай бирдан,
Лап ягъаз кIан хьана Фергьадан гардан:
«Зун –Хосров, кичIедач шартIарикай заз,
КукIварун лазимди къван я, чил  туш ваз.
Накьвар икI  хьайитIа, гьикI эгъведатIа?
Икьван накьвар гваз ам  гьикI къекъведата?»
Ахпани лагьана : «Чи шартI- чаз къанун,
Эгер ам  чIурайтIа, мерд ксар туш чун.
Ахъая вуна гъил, къалура сенят,
Чнани килигин, вуч я ви ният.»
Фергьада тадидиз къалабулух кваз
 Лагьана : « Шагь сагърай,  къалура дагъ заз»,
Хосрова яргъаяр къалурна лишан,
Ингье , Бисутун  я гила тIвар адан.
А дагъдин гьар са пад -кIеви тир  къванер,
Виридаз аян я  а мягькемвилер .
Шагьди гаф гуникай умуд акатна,
Дагъ атIуз физвай кас фад рекье гьатна.
Агакьна гараваз ам дагъдин кьацIал,
КтIанна вичин юкь, ягъана каца.      
Дуьз  къванцин къенерай атIана  гезер,
ЧIугна шумуд  шикил гьикьванни иер!
Ширинан са шикил туькIуьрна ада,
Саки Эренг чIугна инал Маниди.
Кацадин хци кIуф цлак кутуна,
Хосрован, Себдизан суьретар туна.
Вилик и  шикилдин, атIузвайда къван,
Белки ваз ван хьана,  гьикI ганатIа  чан!
Эхь, чIурна Хосрова  вичин шартIар мад,
Са кьуьзуь къариди пучна икI Фергьад.
Тумуни  жанавур туна ракьуна,
Амалдар агакьна къастарив ина.
Макьаз тумунивай акуна амал,
Вучиз адан геле  гъизва жуваз тIал?
Кьуьзуь, зайиф са хеб тушни и девир,
Тумуна вил твамир , къугъун я эхир.
Ви кьисмет кьачI квачир гъед тирди чиз- чиз,
Тум хьиз вун гуьгъуьна гьатзава вучиз?