Мадам Мунги Ахмед шур. Салим Герейбеков

Буриле це буриша,
Ва дия шила шанте
ХIадуриле уишав,
Гьачам намке дакIибте.

Гьачам хIязиругьура,
Парижизе арукьес.
ХIушам хабар бурулра,
Хабартизе их бухъес.

Гонай дуцIрумла бари,
Вягъира Парижизе,
ГIяхIлера хьурабуруй,
Хьуравгьура ну хъайзе.

БерхIахъ кьутIра рикиле,
РакIиб намчу ца адам,
Бай гъярцIа, бяхIра жегой,
Михъирра гьаргил мадам.

Жагьил цар, жегой цари,
Жегой цар вавагъуна,
КапIилике бяхъибил,
Цари итI суратгъуна.

Пишрикиб, лишан бариб,
КIунтIубера лимдариб,
Дия мехIур уркIира,
ЦIакьле гъузгъалдибариб.

РукIар итI намзе «Манжур»,
МягIнара багьурра гIур:
«Ну хIа царра, Багьадур,
ХIуни арасес биркур».

Гатахъира беркосил,
Кепугьес бержесилра,
Багьа гьар затла бурар,
Нуни их арасира.

РукIар их: «Мерси, мусье»
УкIусра: «Мерси, мадам».
Бари бикиб, баз бикиб,
БакIиб ахирра гьачам.

Кулехмера тIулекмера,
Лерилрара дицахъиб!
Кисназела арцрара,
ГьупIле намзе дегъохъиб.

Арц дехIте це дугьеса,
«Гьай гIяйпай», - ну укIулра,
Лерилра дия ярагъ,
Ну ахмахли дицилра.

«Мерси мадам» укIуле,
Лебил затра бержурра,
Ну айихъугьубхIале,
Их анцIбукьра аргъира.

Це пайда хIабаргира,
Кисназе кепекалра,
Парижла гъурдашике,
Кеблалике вакIилра.

БекI буциле кайиле,
Мурхьле пикри ухъунра,
Иш гьанна гIякьлу бугьаб,
Дия шила халкьисра.

Нам дугьубте мадугьаб
ХIушам, шила адамле.
Батия мусьехъумбас,
ЦIуба чархла мадамте.

Лебичи нушияра,
Жегой чархла рурсбера,
Дубуртала шимазе,
Ихти цаб акIунтера.

Базалике дикуле,
Чува диги хIудирцу.
Саламатле башуле,
ГIямрула гьуни бурцу.

Ва дия шила шанте,
УкIулра ну хIушазе:
«Рахле амру бугьале
Ардукьес парижизе
Варе, кьасра барая,
ХIадикес мадамтизе»

шур. Салим Герейбеков