Смачна есцi!

На стале, здаецца, пуста...
Стыне бульба, скварка стыне,
Покуль квашанай капусты       
Не паставіць гаспадыня.      
Ах, капустачка, капустка!
А ў капусце — журавінкі!
Смачна-соладка і хрустка!
Аж цякуць у госця слінкі!
***
Запрашаю на бліны,
Ох і смачныя ж яны!
Пульхныя, бы пірагі!
З'еж, папросіш і другі!
Тоўстыя , румяныя!
Хочаш, са смятанаю,
Можна з мёдам — выбірай.
А з мачанкай — проста рай!
***
Вось вам мяса! У гаршчочку!
Пакладзеш яго за шчочку -
І растане! Смачна, люба!
Мякка - з'есць яго й бяззубы!
***
Ды якая слава мясу,
Як на стол не ставяць квасу!
Без кваску няма бяседы,
Ні вячэры, ні абеду.
Чым запіць бліны й каўбасы?
Беларускім хлебным квасам!
***
Налятай на перапечкі!
Цёпленькія, толькі з печкі!
Нос казычуць смачным духам.
Не адцягнеш і за вуха!
З тваражком сваім, вясковым.
Еш, смакуй і будзь здаровым!
***
Да закусак ёсць і пляшка!
Ды й сакрэт у пляшкі ёсць:
Перакуліць чарку госць -
І пайшоў бы ў скок! Ды... цяжка!         
Ногі... бы звязаў — хоць плач! -      
Наш мясцовы «спатыкач»!


Смачна есці(бел.) - приятного аппетита

Написано для какого-то мероприятия, то ли выставки, то ли конкурса по просьбе знакомой)))