Аслан ва чlакьал

Асландиз виликан гьунар амачир,
Гъуьрчерихъ галтукдай гужар кумачир.
Агакьна кьуьзуьвал,хьанвай ам ажуз,
Тамарзу амазвай са тике якуз.
Вири гьайванрини аслан негьнавай,
Ялгъуздик чуьллери къвекъвез-тек амай.
Жагъаз лугьуз,белке фидай затl-сивиз,
Кьвекьвезвай а язух,юкъузни йифиз.
Эхир гишинвилиз гуз тежез давам,
Галатна,аватна гьалунай,тамам.
Чlакьалдиз акуна асландин и гьал,
Рахшандун ниятдал хьана ам мукьал.
Агъузнач чlакьалди кьил-салам ганач,
Тапацар адан,мад теменри кьунач.
"Пачагь"-ваъ,тlвар кьуна эверна адаз,
Рахана асландив ам,ягьанатаз.
"Гьикl я вун,я аслан.тlуьн авани ваз,
Вугудан якукай са тlимилни заз?
Тахьайтlа як вири на текдиз тlуьна-
Азият гьалтнава гила руфунал?
Жаваб це,гаф тушни жузазвайди,за,
Лал хьана акlанван,а ви мез,хура?"
Асланди,рахазвай хьтин вич-вичив,
Лагьана:"Мукьуз ша,вун,мад са гъвечlи.
Хъгьизмач япариз,кьуьзуь хьанва зун,
Лугьур гаф аватlа,патав,лагь,ша вун."
"Ингье,хьана мукьуз-вавай вуч жеда,
Лугьузван вуна,заз вакай кичlеда?
Вахтар авай,кьадай на жув пачагьдай,
Эцигдачир зун гьич гьайванд чкадал."
Асландин лап патав атана,чlакьал,
Тикрарна гафар мад,чlурни тийиз,гьал.
Асланди:"Зун дидед пачагь хьиз хана,
Гьавиляй,пачагь хьиз за жув тухана.
Садрани,садазни агъузнач за,кьил,
Гишини амукьна-ахъайнач за гъил.
Гьамиша жагъурна,тlуьна таза як,
Леш тlуьнач,гатанач-са чарадан рак.
За вун мажбурнач,гуз темен,гъилериз,
Вун вич вердишди я,ялтахвилериз.
Ви пеше-гужлудаз,кьил авун,агъуз,
Викlегь хьанван,акваз зун,гьалсуз,ялгъуз?
Аслан хьиз атана и дуьньядал,зун,
Гилани амукьдач,гъиле,чlакьалрин.
Амма вун чlакьал хьиз атана-гьакlни,
Фида и дуьньядлай-им я ви гьакьни."
Хуьтягьна вичин гаф,ада,лагьана,
Са капач,чlакьалдин кукуз,вегьена.
Чlакьалди цавани вичин чан гуда...
...Кlелдайди,несигьат жува хкуда.