Вокзалдал

Хъуьтlуьн са мекьи
Югъ...Нянин бере,
Рекьерин вокзал.
Инсанривни къе,
Жуьреба-жуьре,
Ацlанава,зал.

Акъудиз я вахт
Садбур-ацlакьна,
Садбур-кlвачерал.
Базибурни гьакl
Са-сада гьахьна,
Фенва ахварал.

Са дишегьлиди
Рахаз,эфирдай,
Хабарар я-гуз.
Вокзал эгьлидиз
Хквез-хъфидай,
Поездар лугьуз.

Кьуьзуь са баде
Цлак агалтна,
Пул агагъзава.
Залин са пипlе
Юкьни кьве къатна,
Ам-акъвазнава.

Мекьи я хъецел-
Гужлу къай ква,
Зал я -чими хьиз.
Гъил виликна:"Це,"-
Къарини ава,
Чинриз килигиз.

Элячlдай чlавуз
Патавай са кас,
Алхишиз я-ам.
Хаш чlугуз,цавуз:
"Бог храни Вас,
Да поможет Вам!"

Адаз-язухдай
Пулни гузвайбур,
Туш гзаф...кьвед-пуд.
Такваз-кьасухдай
Физва парабур...
"Прости,Господь!"

Вугана гъиле
Адан-агатна,
Зани са ччар-пул.
Легьзед,вил-виле,
Акьуна-гьатна,
Зи чанда,са фул.

Шел акатна захъ...
Гьинва авладар-
Кьабулзава,гьикl?
Туш им дидед гьакь!
...Нефес хьана дар-
Катна зун хъецик.