Азраилдин бахшиш
Ацlукьна нез-хвазаваз,
Са агьилди лугьудай
Ихьтин кьиса гьена заз.
...Са кефчи тир инсандин,
Рехъ,са сефер,атlана,
Азраилди баянда:
"Рекьидай вахт атана".
Касдин кефи чlур жеда,
Ам гъамари тухуда.
Вуч хъейида,чир жедач,
Атlана ранг,хъулгьуда:
"Имкан ятlа,са кlус заз,
Муьгьлет хце вуна мад.
Крар кьилиз ахкъудаз,
Са тlимилни кlанда вахт".
Азраилди жузада:
"Гьикьван уьмуьр хгун за?
Мад ваз гьикьван бес жеда,
Мус на крар ахгудда?"
Викlегь хьана са жизви,
Касди адаз жавабда:
"Гьар зун хьайи межлисдин
Са къаз-са йис заз кlанда".
Азраил хъиле гьатда:
"Ваъ,-лугьуда,-жедайд туш.
Ахьтин лагь хьи,са вяде,
Аллагьдизни хьурай хуш".
"За хвай эрекь-чехирдин,
Гьар шуьшедиз-югъ це,са".
Атlана ван фагъирдин,
Азраилди:"Лагь масад!"
"Зи гьар са ашна папай,
Са гьафте це,акl ятlа."
"Ам кlан межер ваз завай,
Чара теклиф-аматlа!"
Касдин чара атlана,
Азраилдиз:"Лагь жува,
На лагьайдал атана,
Рази жеда зун цава".
Агакьайла кар инал,
Азраилди лугьуда:
"Гьар са рикlин дустунай,
За ваз са йис хгуда".
И гаф гьена,язух кас,
Бейкеф жеда лап тlарам.
Кьил гатана,мет ягъаз,
Рикl хъуткъуниз,шеда ам.
Свидетельство о публикации №116102104433