Гуьлперидин шиндакьар

Эвер гана кlекери,
Хуьтягьнава-аям я.
Гуьзетзава пекери,
Чи Гуьлпери-пакам я.

Фидач,лугьуз.мектебдиз,
Вичиндилай кьунава.
Месик кума ам текдиз,
Лап терсвале тунава.

Хьанва вири гьалават:
"Мектебдиз фин герек я".
Амма чи гъвечlи тават,
Гьуьжетунал зирек я.

"Къарагъ,-лугьуз,-чан бала",
Темен гузва емеди.
"За ваз нини къачуда",-
Хиве кьазва имиди.

Шиндакьариз,Гуьлпери,
Рази жезвач гьич сакlа.
Кlевиз мичlна вилерни,
Хкlучlзавач месикай.

Чlехи бубад,бадеди,
Минетзава къетненлай.
Вичик туш,на лугьуди,
Гьизвач адаз гаф,лагьай.

Ажуз хьана амазва,
Хкуд тежез месикай.
Ам тарсарал кlамаз я,
Кlевиз кьунва къуьцуьган.

Ама вичин чин чlуруз,
Кардал геж жезва буба.
Мецел къвезвач гьични руш,
Саки авунва туба.

Тек са дидед,цlун-кlвале,
Акьалзавай чкалар.
Течизни и велвела,
Ийизвайд тир вичин кар.

Гьакl дуьшуьш яз,куьхъ ятlа,
Герек шеин багьнадай-
Лугьуз,ана аватlа,
Рушан кlвализ гьахьна ам.

Гуьлперидиз акуна,
Дидед гьиле авай кlар.
Къарагъна фад,къудгъунна,
Чир хьана мад вичин кар.