Газетдиз кьуьзуь касдин чар

Гуьрметлу тир редакция,

Ахъайин квез зи дердияр:

Къари кьена дуьм-дуьз вад йис,

Къведайдавай гьал жезва пис.

Рак ахъайдай амач заз кас,

Яргъа хьанва гада, руш, свас.

Жаван уьмуьр сегьердаваз,

Диден буба шегьердаваз,

Хтулризни хуьре кIелай,

Алатнава рехъ рикIелай.

Яд ат!ай регъв хьиз хьанва кIвал,

Низ чидай кьван икI жедай чIал.

Аламайла къаридил чан,

Кими тушир кIвале мугьман.

Хквезвай чун гьикI ятIа кваз,

Вацра садра чал кьил чIугваз,

Хъфидайла езнени руш,

Рахкурдачир къариди буш:

Къахунин кIус, шурни ниси,

Юкьвалай пайдай чи пенси.

Хкуддайла картуф-газар,

Хуьре жедай кьведни свасар.

Кьезилардай хьайи бегьер-

Са пай чун тир, кьве пай шегьер.

Югъ акадриз къунши Мелек

Чиниз къведай, тежез гьелек

Зи къаридиз гудай куьмек,

Хъфидайла са банка нек.

Къари кьена гумач зав кал,

Берекатсуз хьанва зи кIвал.

Нисини шур, заз нек амач,

Зун садазни герек амач.

Пенсидинни авач рябет,

Багърийризни чир хьуй, гьелбет.

Заз ам харждай рекьер ава

Зи кIвачера мехъер ава.

Чан играми редакция,

Зид кIевелай тIалабун я.

Куь газетдиз це малумат,

Хъижедайвал зун саламат.

Чарасуздиз заз са къари,

Чанда такьат амай, дири.

Зи уьмуьрдиз даях дестек

Жагъур хъийиз ая куьмек.

Тежен артух яцIуди ам,

Жен маъ хьтин лацуди ам

Буй-бухахни авайди жен,



Пара яшар тахьайди жен,

Зунни акьван хьанвач кьуьзуь

Пудкъанни цIуд яшар я зи.

ХъижедатIа чидач шумуд,

Са пуд цIудак кума умуд.

ЦIалцIамарна чуру-спел,

Агакьарда шикилни квел.

Югъ-йикъахъ къвез тежен энгел,

Зун хзандихъ хьанва цIигел.

Амачир заз маса мурад,

ХъувунайтIа куьне зун шад.

ХъхьанайтIа зун эвленмиш,

Хъижедай зи кьуд пад дуьзмиш.

Гурмагъда гумм, къулал къажгъан,

Кроватдал хъуьтуьл бажгъан,

Сариш тада бустанни сал,

Гьаятдални регъу квай кал.

Динж хъжедай къарсат хьай рикI.

Илгьамдини ахъайдак цуьк.

Сейли ийиз зи цIийи яр

ТуькIуьрдай за шад манияр.

Тадачир за куьн гуьзетиз

Агакьардай куь газетдиз.

Чун кIеви чирхчир жедай,

Закайни куь мухбир жедай