Баб, йисар, хтул

БАБ, ЙИСАР, ХТУЛ

Бабаз алахьну дарши гъагъивалар
Гьацира кьутІкьалдайи яшайишдиъ.
Пис иблис диндин уьргърювалар
Ккюргъюз буржлу гъахьну гьадму йисариъ.

Жан, хилар, машар гъургну йивну кІашар
Гьяйиф дарди харж дапІну веледарихъ.
Аьгь гъапІну аьрвалар, гьили шлу гашар
Ужуз духьну, юкІв хъимиди уьмрарихъ.

Жилар талаф гъахьну кур гурбагур цІигъ.
Кьисмат гъаягънаъ гъабхьундар касибарин.
Дурарин утІубчІвну кІури гьарай-чІигъ
Насигьятарихъ хъпехърур гъахьнин бабарин?

Гележегдиъ веледар мягьрум гъахьну
Ччивар ккадатІу гьарин буш циркларси.
Бабари чпин кІул‘ина гъагъ гъибсну
Ширейихьди ацIри кьюкьяр курцІларси.

Аьжузваларин гъирагъар рякъдайи
Карк хю жвумишваз тувриз ул ади.
Бажаругъ хилар хътар пну баладйи
Вахтну саркьйир гъадагъуйиш кми-кмиди.

Бабан пичриин йигьаг иливнайи,
Гъарзар ккирчну ичІи штук урхьуради.
Веледар хабарсуз нивкІуз гъярайи,
Гъазниъ айи "хинкІарихъ" ул хъимиди.

Дердер аьхюдар ву, хъа гаш‘вал зина.
Веледарин сузйириз дарман адар.
Бабхьан ергуз шулдар чан кІулхьанзина -
Динди гъухрин гьялкья буш апIуз ккадар.

Гъи баб имдар, кечмиш гъахьну уьзриан,
Хтулариз васият тувуз хъудруркьди.
ДитІирхну гъяйиз ярхла юрдариан,
Ччиварра гъерццну жилиз дурукьди.

ДучІврукьу йисари баб гъапІну йисир.
Хтулариз багърум ругар ккунди имдар.
Дурари гъибисундар бабан кІван сир,
Гъалабалугъ гьич саб уьмрикан кимдар.

Бабна йисар чиб-чпигъ зарб элегнийи,
Фуж тахсиркар, фуж дугъри вуш аьгъдарди.
Гьюжатариъ йисар гъалиб гъахьнийи
Бабан жафйириз зат инсаф адарди.

Хтулира зегьлуди дердер зигура.
Намус ками бабан аьжал кІваъ ади.
Кьан ву, бабси йисарра ккудукІура,
Жвувкантина наслариз фукІа дарди.
                1987