Табшуругъ

ТАБШУРУГЪ

Гъи ккухьрайи йигъандин
Таза ахсрарин Суфат
Жвуван кІваъ айи гъвандин
Диван апІруб ву кьувват.

Ригъди дурар гъизилихьди
Сифте нубат аьрхюра –
Аьлакьайиъ Жилихъди
Къадим гьюрмат уьбхюра.

Силис апІдар сарихьан
Кюдюрхюрайи ахсрари –
Салам хъубкьна Уьмрихьан
Чав аларгъган амсари.

Дагъдиинна, набаллугъ
Сюгьюр миди удучІвна.
КІваъ ади саб табшуругъ
Чан жини уьмриъ учІвна.

КІакІарилан аьршарайи
Бали юкІв аьлдябхъюра.
Перде гьадапІурайи
Ачухъ сягьна рябкъюра.

МучІу кьулар, зав, ахсрар
Бализ къанажагъсуз ву.
Адруси дурарин тахсрар
Уьмрин шартІ‘ин гъаних ву.

– Тамам гъапІунза, аба,
Уву туву табшуругъ.
ФукІа айиб адайда –
Ибшри му узуз шулугъ.

Я гъабхьдарзуз васият
Йиз мураднахъ хъаърайи.
Гъибихъундарзуз кьисмат
Уву узуз кІурайи.

Къур ву ихь сяргьятар
Кьаби Кьаркьлилан рякъру.
МичІал ву аьтрафар
Зяиф ахсрари аргру.

Гъабхьундар йиз кІваз тясир
Узаъ эргвалилан гъайри.
Мумкин ву мидин тахсир
Йиз гъянаъ ади вари.

Яв табшуругъ мянасуз
Йиз хасиятназ хуш дар.
Деврикан Гьякь дуфназуз:
Йирси ляхнар жандиъ уршдар.

Хуш шлу пай абгурайи
Фу ву ихь уьмриз ккуниб? –
Девлет гъадабгъурайи
Ккуни кьиматнахъ гъяниб.

Ав, аба, гизаф девлет
Увухъ сабанра дархьиб –
Гъийин ич уьмрин Метлеб
Гьадму ву бахт хурайиб.

Гьаз ву йиз сюгьрин рякъбар?
Ужуз ву яв табшуругъ.
Диди йиз гаш ул абцІдар
Узлан алдатунза ругъ.
                1988