ЧIамччар ва арф. Басня

            ЧIАМЧЧАР ВА АРФ
               (Басня)

Хьадан жихрар хъуркьнайи багъдиъ чIамччар
Шадлугънаъси ай, ипIури-убхъури;
Жихрарин гъячяргъю йишвар ва урчар
Дидисну, деъри; пиянди аьлхъюри.
Эгер жихир, хьувал`ан гизаф меэл,
ГъутIубкIиш я, гьаргъян абхъну, гъабхьиш швур,
ЧIамччар дид`ин алархьуйи элбеэл,
ДипIну ашра, йихурайдарси гашу.
Йиччвуз дуфнайи арфар духьнай инжик,
Дибрихъри жихир, кудрубкIуб чIамччлин лик.
«Хъебехъай,- гъапи чIамччариз саб Арфли,-
ЧIамччтIан даруганси багъдин агьали,
ГьапIуз мици марцци дудубгначва нач -
Вардиз ккипуб ву табиаьтди гъюдрач!
Гъит гьарди, чан кьадар дипIну, фун абцIри.
Анжагъ гьапIуз шулучва вари кабцIри
Ичв ликарик кайи урсли ва кьурши?
КубкIу йишв`ин рабгъурачва иццрушин!»
Хъа чIамччари кIур: « Арфариз маш ккадарш,
Гьамциб багъдиъ учу зигуринхъа гаш!?
Учу гъиту кацIу йишвар, иццрушнар
Вуйичв кьялхъян гъафидарин гъайгъушнар!»

Гьамци бязи «хушлу» уьмур хъапIрудар,
Чпин лик кубкIу-кубкIу йишв пуч апIрудар
Ва фужкIа аьгъдрудар, жвувтIана гъайри,
Гьич ахъидар инжик гъахьирин гъавриъ.