Ляхла гъул

ЛЯХЛА ГЪУЛ

Латар, гъярар, кьашар, къушар,
Хъайи шубар ярхи кушар,
Швуваз гъафи яхши швушвар
Айи мискин ву Ляхла гъул.

Жиларин мяълийир тІарам,
Хпарира хъипри:  тІа-ра-рам.
«Гьяйвнар» жаргъруси гъа-гъа-рам
Сесер айишв ву Ляхла гъул.

Марччар, бабарин лижар бул -
Хтулариз тадабгъуз ккунди пул -
КубчІвна интІйирик гьациб тІул,
Аьйибнакк ккипуз Ляхла гъул.

Гъирагъ бужагъ – дурчар, кьурчар,
Кьамкьарихъна арсру кьуршар,
Багахь хьашра гъунши Кьулккар
Безетмиш дарда Ляхла гъул.

Фила-а фурсарик ка Ургъ‘ар,
Рякъяр хъачухъ кІури – Фурдгъар.
Пай дапІну чиб-чпигъна Яргъар –
Гъядру чІукІ ккубкьу Ляхла гъул.

Хирар–гъюрдар вуйишра хутІлар –
Картфари уьрхюра УртІлар.
Гьарин гьюрмат айи ВертІлар
Хайирназ кялхъра, Ляхла гъул.

Чпин гъаразнаъ ахьна Ккувгъар
Хиликк ккаъну швеъ хъайи Гьяргъяр.
Саб, кьуш ханжал али гъяргъяр
АйибтІан вуна, Ляхла гъул.

Бизарди а саб Ляхла гъул.
Бикарди гъябхъна багъри гъул.
Бакарди даршул ярхла гъул.
Кагьалди учв вушул?! Сагъул!
            1988