Яр авай захъ жегьил чlавуз,
Сирер сад ийиз кlан хьанай.
Хкаж хьанвай зун лап цавуз,
Залум кьисметдиз ван хьанай.
Рикl кlевиз кьан жува-жуван,
Завай кьисмет вердиш женни?
Рикlин дердер рахаз бирдан,
Уьмуьрдин рехъ дегиш женни?
Рикlе ашкъид цlай тамукьай,
Ялав туш хьи зи муьгьуьббат.
Залум дердер захъ галукьай,
Зайиф женни зи муьгьуьббат.
Вад къан уьмуьр заз герек туш,
Жувахъ кlани яр тахьайла.
За садазни гаф гудайд туш,
Рикlяй-рикlиз кlан тахьайла.
Залум кьисмет
© Copyright: Марьям Алискерова, 2016
Свидетельство о публикации №116090606685
Свидетельство о публикации №116090606685
Рецензии