Тютю гъушраканна даттликан

             
         ТЮТЮ ГЪУШРАКАННА ДАТТЛИКАН
                (Ихтилат)

КкудукIубси
Гъюлягъ кьюрдун аьхълушнар,
Тютюгъушраз
Гизаф гъахьну гъайгъушнар:
Йигъан-йигъан
Айвандикк ккай къефсиан
Къаршуламиш апIура
Диди гъушар.

Инглис, француз,
Аьраб, мумкин ву, гуржи
Ва жакьварин
имбу чIалар харижи
Сегьриндиан
Йишвну вари ахайиз
Текрар апIуб
Ву тютю гъушран буржи.

Текрар апIбу
Вари жакьварин мукьмар,
Дидиз чан мукьмариз
Вахт гьубкIри имдар…

Вуйи вахтна
Магьа гьамциб аьгьвалат,
Айвандиккна
Гъабхну Замири саб датт.
- Бабу тувуб
гъибтундарза гъи убккуз, -
Гъапну бали.
- Магьа, Тютю,
Дуст увуз.

Тютю гукIни гъабхьну:
- Фициб уьжсиб вуш,
Кагъзин ишкIиъ
Йиз дукI ипIурайи гъуш!
Саб-кьюб чIигъ гъапIну
Тютюйи, дубхьну дерд,
Ва ккебехъну,
Дар пиди, кIури, учв мерд.

Гьар фици вушра,
Гъуншдихъди таниш хьуз,
Хъюбгънийи думу
Даттлик гафар кауз.
Амма даттли
Тютю гьяспикк апIурдар –
Уьлихъ хъюбгъну думу,
ккудубкIну удар.

Хъасин даттлиз,
ЮкIв дябхъяйиз, тувну шид,
Кьул иливну,
Замири хъябкьну ишикI.
Тютю гъушру,
Гъуншдиз гъабхьиган мажал,
ЦIийи кIул`ан
Ккебгъну дидихъди гаф-чIал.

Саб жавабра
Даршулайган ишкIиан,
Гъаври шуладаршул, дупну,
Чан чIалнан ,
Тютю хъюбгъру
ЧIалар`индии харижи
Даттлиз ктибтуз
Чаз аьгъю ужуб-харжиб.

Му чIаларизра
Даттли иб йивурдар.
Гьаддиз – гъунши
Вушул, кIури, бегьем кар,
Эвелиан ккебгъру Тютюйи хуш-беш –
Му ражари,
Шлубкьан апIури чIигъар.

«Кьютт – кьютт!»-
Жаваб тувру даттли, хъжабгъури,
Дидин чIалниинди
 му вуйи: «Ери!»
Амма Тютю
Дюзди гъаври шуладай.
Диди, вушул кIурай
Даттлин чIал китай.

-Ибшри, гъунши,-
Гъапну Тютюйи. – Мяъли
Закур йивурза,
Гьамус ккебгъна ахъли.
Амма кьаназ
Гьич нивкI гъюрдар тютюйиз –
Гъунши гъюбан
Тясир дубхьнайи дидиз.

СабцIиб мани
Хьуз хъюгъри дидин улар,
ВуйиштIана,
Хъубкьру дишла гьацIишвар.
Вагь! Мушваъ му шулин?!
Уьъйири даттлин
Хъюгъру айвандиккан
Теетуз чIимрар.

ЮкIв дутIрубкIди,
Саб нуфт гъубзру тютюгъуш.
«Ккебехъ, -кIуру диди,
-Ккебехъ, я бейгъуш.
Гьамусяаьт
Хъебгрува вари уба.
Мушв яв аьхъ дар,
Ву урчIвубпи мертеба.»

Даттли гьисаб
апIурдар гафар дидин.
Хъергну,
Вари хизан шулу ликриин.
«Баладайи, -кIур гагайиз
Дадайи,-
Закур аьрзназ
Ихь гъуншйир гъафундайиш.»

Амма даттлиз
Ктайи сабдинра вижна –
ГвачIниндиз
Алдабгъундайи чан зурна.

ГвачIнинган
Хъана Замири му надинж,
Женгнаан гъафи игитси,
гъапIу динж.

Даттлин хъюлу
АбцIнайи тютюгъушраз
Гьархну айи
Вари чIалар, аьгъю чаз.
Дадайи датт
Айвандиккан гъабхбахъан
Гъюз хъюгънийи
Думу сабцIибди гьялназ.

Му йигъ гъубшну
Дидин нивкIуз гъябгъюри,
Чан вазифйир гьуркIуз,
Амриз дяргъюри;
КIваъ-кIулиъкьан
Имдайи апIуз текрар
Кючейиан гъюрай
Жакьварин мукьмар.

Тек саб-кьюбан
нивкIкан гьарза улхури,
Текрар гъапIний
Даттлин чIал`инди
«Ери!»

Гьамци, йигъ дубшну,
Гъафнийи вахт йишван
Ва, акв кутIубшвну,
Гъабхьнийи гьацIишвар.

Сан учв гъудубжву вахтна
КучIвну уьгьйир,
Хъебгну тютю.
Вагь уьгьйир дар – ву уьъйир!
Му йишванра
Даахнайи хизанар
Айвандиккна гъафну,
Хъидиржну леъфар.

Сарун мушваъ
Фу гъабхьнуш, узуз аьгъдар.
Аьгъязуз, пис дар
Тютю гъушран ляхнар:
Багарихьди
Раккник кайи звонокдин
Сес уйнамиш
апIурай диди, дустар.